uMthunywa
LESI yisikhathi sebusika balutshwana abangelamumbu. Kuyadliwa! Hatshi imilomo ihlala imanzi.
Wena ulayo yini insimu njalo ulawo yini umumbu.
Uwudla njani? Ngoba kufanele uwudle ngendlela ezitshiyeneyo. Ekudleni kwesintu, imvelo umumbu uqakathekile njengoba irayisi lamagwili eqakathekile kwezinye izizwe.
Nanku okuvela emunjini lendlela zokuwudla.
– Umumbu omanzi ophekwe lamakhasi awo
– Umumbu omanzi owosiweyo emalahleni
– Izinkwa zomfahlwa zomumbu omanzi
– Amagwadla omumbu owomileyo
– Amatshakada
– Impuphu yesitshwala yansuku zonke
Amatshakada ledobi
Ngezikhathi zomqando abantu badinga ukudla okunengi ngoba imizimba idinga ukufudumala njalo ibe lamandla okuvikela imikhuhlane enjengophepha lemivimbano.
Kufanele kuphekwe ukudla okulemikatsho okunengi njalo kusuthisa.
Okudingakalayo
1 Amatshakada agigiweyo kumbe athengiweyo esitolo
2 Amafutha (cooking oil)
3 Isawudo lepepa
4 Imbiza, lamanzi lophini
5 Idobi ozicolele lona kumbe elithengwayo
6 Uchago
Ukupheka
– Lala uthambise amatshakada emanzini aqandayo, lokhu kwenza avuthwe masinyane
– Bilisa amanzi embizeni
– Faka amatshakada athanjisiweyo ukuwapheka
– Thela amafutha lesawudo
– Pheka aze avuthwe
– Nxa esevuthiwe wephule eziko
– Wayekele aphole kancinyane
– Faka idobi eliqandayo ematshakadeni
– Bonda ndawonye uthele uchago kancinyane, olufudumalayo
– Phakululela imuli yakho idle
– Uyawadla enjalo kumbe lenyama lemibhida ngokuthanda kwakho
Amatshakada lomhluzi wendumba
Okudingakalayo
1 Umhluzi wendumba (sugar beans)
2 Inkomitsho ezimbili zendumba ezomileyo
3 Imargarine inkezo zokudla ezimbili
4 Ihanyanisi eyodwa
5 Uchago ngenkomitsho yetiye
6 Isawudo, ipepa kumbe ibilebile, ufulawa
7 Imbiza loba umpika wokupheka.
Ukupheka
– Amatshakada asephekwe avuthwa alaphaya
– Thambisa indumba uzipheke zivuthwe
– Hluba ihanyanisi uyiqobe iziqana uyifake endumbeni upheke
– Khathesi faka ifulawa echagweni ngokhezo lwetiye
– Goqoza kube libundubundu
– Thela embizeni yendumba kuxhwathe ndawonye okwemizuzu emihlanu emlilweni omncinyane
– Woba ulokhu uphendula ukuze kungatsheli
– Faka imithikazana (spices) olayo ipepper, ibilebile, iparsley, lokunye nje oyabe ulakho
– Yephula eziko ngemva kwemizuzu emihlanu
– Khathesi hlanganisa amatshakada lomhluzi wendumba etshisa kumbe eqanda
– Phakululela imuli yakho idle ikholise. Lokhu yikudla okumnandi okuqinisa umzimba. Dlana ukholise lawe.
