uMthunywa
Thokozile Mbedzi
AMAPHOLISA akoBulawayo abophe umfana oleminyaka engu-15 osolwa ngecala lokudlwengula umamangala oleminyaka engu-7 abaloja bonke ethunywe uphini.
Umetheswacala kunye lomamangala amagama siwagodlile ngenhloso yokubavikela kubikwa bahlala bonke elokitshini leNketa koBulawayo.
Kubikwa mhlaka 13 Mpandula umamangala wathunywa nguyisekazi ukuthi ayothatha uphini endlini. Uthe engena umetheswacala ole-15 abaloja ndlunye wambizela ngakibo wamdlwengula.
Omunye umakhelwane okhulume loMthunywa uNkosazana Thabani Dube uthe isenzo somfana lo siyethusa.
“Asazi ukuthi umfana lo ulesibindi esinganani, kambe umntwana lo wathi ethunywe nguyisekazi uphini yena wakutshaya indiva wamphambula wambizela endlini yangakibo wamhlukuluza njalo enganaki ukuthi abadala bakhona njalo bamlindele njengoba wayethunyiwe.
“Uyisekazi wamangela ukuthi kanti udinga njani uphini lona luhlala lapho azikhona. Uthe ekuphendukeni kwakhe uyisekazi wasembuza ukuthi uphuziswe yini wasechaza ukuthi umetheswacala ubemhlukuluza njalo lokuthi lokhu kakuqalisi, wakuqala ngenyanga kaNcwabakazi,” kutsho uNkszn Dube.
Uyisekazi kazange abe esaphozisa amaseko wahle wayabikela amapholisa.
Isikhulumi samapholisa koBulawayo uInspector Abednico Ncube ebuzwa ngodaba lolu uvumile wathi solufikile ehofisini yabo.
uInspector Abednico Ncube
“Udaba lomntwana obanjwe iganyavu ngomunye abaloja bonke solufikile ehofisini yethu.
“Abadala sifisa bafundise abantwababo ukuthi yiloba ngubani ulakho ukubahlukuluza kungakho akumelanga bavume ukubanjwa imizimba yabo.
“Sikhuthaza uzulu ukuthi amangale wonke amacala okuhlukuluzwa ngokuphangisa njalo abazali labo kabavikele abantwana hatshi ukubafaka engozini zokudlwengulwa,” kuphetha uInsp Ncube.
