uMthunywa
Mehleli Dube – Bafunga bagomele ababili mhla betshadayo, bathi bayokwehlukaniswa yikufa, kungakhathalekile ubunzima abazahlangana labo bathi bayobunqanda noma kanjani.
Ngokuhamba kwesikhathi, inengi lisuka likhohlwe izifungo lezi, kuqale ingxabano lokungathembani, kuxujwe ngayo inhlamba njalo nje. Uthando yinto enjengeluba, lufuna ukuhlakulelwa njalo luthelelwe ukuze luhlale luluhlaza.
Ukufiphala lokufifiyela kwesibani sothando kutsho ukuthi kukhona okuyabe sekutshaya amanzi. Kanengi ungabona umkakho evela emsebenzini afike avuke ngolaka lawe uze umangale ukuthi ngabe uphambaniseni ufice labantwana sebetshotshobele uyabe edlule kudlalicatsha ngoba lona liqaphele ukudiliza isiphala sothando lisakha esalo.
Ungabona njalo esekufihlela incwadi ezikhomba ukuthi uhola malini “payslip” uyabe efuna ukuthi ungazi ukuthi uhola malini khona ezathola ithuba lokuhlephuna okuyimbijana komholo ekusa kulowomama athi nxa esevela khonale esefika endlini avuke ukeketane ngoba imali ingeneli, uzwe esesithi lidlalisa ukudla, yena evele ethenge okungeneli inyanga.
Kwesinye isikhathi ungezwa ebuya ekhala ngokudinwa ethi umsebenzi mnengi, etsho ephonguthi mfe, yena edlule kudlalicatsha lakhe, umthombo uyabe usuhubile, esemelele ukuthi uqale ugobhoze.
Nxa umkakho esethe waqala ukujola kuvamile ukuthi abe ngumuntu wamanga. Ubuhle bamanga yikuthi ayakhohlakala ngoba kunzima ukuhlala ucabanga ukuthi izolo uke wathi lokhu lalokhuya. Ungamlalelisisa, ukufake engqondweni uzamangala kwelinye ilanga esephinda indaba ake wakutshela yona esephawula ngeyinye indlela sekutshiyene leyakuqala. Umngane wami uJabu wasuka kungoLwesihlanu waya chitha impelaviki ledlalicatsha lakhe, waphenduka ngeSonto wadlula emkambo ethenga iqhude lejodo watshela umkakhe ukuthi ukuphiwe ngubabakazi wakhe.
Ngokuhamba kwesikhathi eselibele kwathi sekumele umakoti wakhe abonge uyisekazi nango gqi, esithi waphiwa ngumalumakhe yahle yawuchitha umuthi inkonyane.
Phela ngolimi lwabondlebe zikhany’ ilanga bathi “if you are to be a good liar, you must remember everything.”
Abaziyo bathi amanga lolaka kubangelwa yikuthi uyabe usazi ukuthi into oyenzileyo ayiqondanga, ngoba idlalicatsha liyabe limkhonyela, laye azokhwitshizela kuwe.
Kudlalicatsha bathi ufica inkalakatha yendoda isigoqe umsila angani licalaha lisesaba inkunzi yebhubesi, ebhonge ewatheni ngesikhathi sokuna kwezulu. Kwesinye isikhathi ungambona efika ezenza odakwe kakhulu engenelisi lokuma etsho ezenzisa. Abangabambeki lula bathi ngabakholwayo ngoba bona bevala ngomthandazo.
Ayixabene
Mehleli Dube 0772673682
