uMthunywa
Khanyile Ndebele
ABE-ENVIRONMENTAL Management Agency (EMA) sebexwayise uzulu ukuthi atshiyane lomkhuba wokulahlela yonke indawo amapulasitiki ngoba eyingozi kumpilakahle yabantu kunye lezifuyo.
UNkosikazi Amkela Sidange onguEnvironmental Education and Publicity Manager e-EMA ukhulume lokhu kumbukiso weZimbabwe International Trade Fair ogqitshwe ngoMgqibelo kuviki ephelileyo.
Uthe abantu abananzeleli ukuthi amapulasitiki aludubo kumvelo yethu ngakho uzulu kumele akuqaphele ukuze avikele ingozi ezingehlela izifuyo kanye labantu.
Amapulastiki- umfanekiso uthethwe ku Shutterstock
“Abantu kabakunanzeleli ukuthi amapulasitiki asesiba ludubo kumvelo yethu. Uzulu kumele azi ukuthi amapulasitiki ikakhulu ezigubhu nxa engaba sendaweni okufuywa khona, abafuyi balakho ukulahlekelwa yizifuyo zabo nxa kungenzakala ukuthi izifuyo zidle amapulasitiki la.
“Njengelizwe enye imali esiyitholayo ivela kwezokwethekelelana, kungakho amapulastiki ngenxa yokuba ayangcolisa imvelo yethu izethekeli zethu zicina zibona sengathi ilizwe lethu lingcolile zicine zingasafisi ukulivakatshela,” kutsho uNkszn Sidange.
“Amapulasitiki ezigubhu la alakho njalo ukungena phakathi kwemigelo yamanzi ayivale okucina kubangela ukuthi nxa izulu lisina amanzi ame emigwaqweni kucine kusibanzima ukuhamba ikakhulu emadolobheni.
“Impompi ezihambisa amanzi angcolileyo lazo zilakho ukuvalwa ngamapulasitiki la besekusiba ludubo ngoba kuzacina kubangela ukudubuka,” kutsho uNkszn Sidange.
Uqhubeke wacebisa uzulu ukuba ungasebenzisi imiganu yamapulasitiki ezimfeni lasemitshadweni ukuze kwenqabelwe ukugcwala kwawo yonke indawo.
“Silawo amandla ukuthi sehlise inani lamapulasitiki. Silakho ukuthi nxa sisemitshadweni kumbe ezimfeni singasebenzisa uhlobo lwemiganu elilahlwa indawo yonke kodwa sisebenzise imiganu yensimbi iloba eyamagilasi,” kutsho uNkszn Sidange.
Ukhuthaze abantu ukuthi bangadobha amapulasitiki la bayewathengisa ukuze aphekwe kutsha.
“Silakho ukuthi amapulasitiki lawa siwathathe ayegaywa kutsha kuphume ezinye izinto. Kungakho-ke sikhuthaza uzulu njengenhlanganiso ebona ngezemvelo ukuthi asizameni ukuthi amapulasitiki la alahlwe ngendlela,” kutsho uNkszn Sidange.
Uqhubekele phambili wathi ilizwe leZimbabwe like lahlala phansi lamanye amazwe ukuze lixazulule uduba lwamapulasitiki.
“Ensukwini ezedluleyo besiselizweni leKenya lapho ebesihlezi phansi lamanye amazwe savumelana ukuthi sizame ukwehlisa amapulasitiki ngakho-ke thina njengababona ngezemvelo sesihle saqalela yikho nje sikhankasa.
Uphethe ngokuthi bakhangelele ukuthi kusiyafika inyanga kaMpalakazi babe sebehlise isilinganiso sokusetshenziswa kwamapulasitiki ikakhulu amaphepha okufakela izinkwa ezitolo, ama-paper bag kusetshenziswe amabhasikiti akudala ayelukwa ngamalala ukuze kungabi lamapulasitiki amanengi.
