uMthunywa
Johas Moyo
INHLANGANISO ye-horticulture esabelweni seMatabeleland North isikhuthaze abalimi bonke ukuthi baqalise ukukhangela ukulima ngelinye ilihlo, balime ezinye izilimo ezivuthwa masinyane ukuze bathole okokudla njengoba emasimini kutshile.
UNkosazana Treggy Mpofu wenhlanganiso ye-horticulture ukhuthaze abalimi ukuthi bathathe ezokulima njengebhizimusi elizabapha inzuzo ephezulu. Uthe kuqakathekile ukuthi abalimi badinge amacebo okuziphilisa njengoba izilimo zitshile emasimini.
“Abalimi sokumele basukumele phezulu banakane ukuthi bangenzani njengoba izilimo zitshile emasimini. Okunye okungalinywa ngabalimi okuvuthwa masinyane kodwa kulenzuzo ephezulu kugoqela ikhabitshi, imibhida yomhlobo wonke, amagwili, labondumba,” kutsho uNkszn Mpofu.
Uthe abalimi kumele bazifundise ukulima izilimo ezivuthwa masinyane wengezelela ethi amaphurojekithi yiwo kuphela angasiza ukuze abantu bathole ukudla okungcono.
“Isikhathi kasisekho kungakho-ke abalimi abasukumele phezulu baqalise khathesi ukuqoqana babumbe amaqembu baqale ukulima izilimo lezi”, kutsho uNkszn Mpofu.
Uqhubekele phambili wathi abalimi kumele bananzelele umhlabathi lapho abahlala khona ngoba lokhu kubanceda ngokuthi benelise ukubona umhlobo wesilimo esivuthwa masinyane abangasilima okufana lokuthi kulomhlabathi olungele amagwili kuphinde kube lomhlabathi oyabe ulungele imibhida lamakhabitshi. Lokhu abalimi nxa bengakunanzelela kuyasiza ukuthi benelise ukulungisa kuhle indawo yabo njalo bayayivundisa kuhle okwenza bathole isivuno esihle .
Abalimi bakhuthazwe njalo ukuthi badinge ulwazi kubadomeni abaseduze ukuze bathole izeluleko eziqondileyo ngendlela zokuqalisa ukulima izilimo ezivuthwa masinyane lokhu kuyabancedisa ekutheni bangamotshi imali lesikhathi belima endaweni ezingafanelanga. Abadomeni abaseduze balusizo okukhulu ngoba bayenelisa ukuncedisa abalimi ngokubapha imihlobo yemithi ukuyabe befanele ukuthi bayisebenzise ekubulalaeni izibungu zohlobo lonke ezingaphambanisa isilimo ukuthi zivuthwe kuhle.
