uMthunywa
Bongani Ndlovu
ABALIMI bakhuthazwa ukuthi balime imibhida ngoba ayikhethi umumo womkhathi njalo iyalinywa umnyaka wonke.
Imibhida ilula ukulima futhi akuvamanga ukuthi ingalinywa ifube kumbe ife njengezinye izilimo njalo umkambo wakhona mkhulu ngoba abantu bayawuthanda.
Ekhuluma loMthunywa uNkosazana Patience Ncube ongumlimi ukhuthaze abalimi ukuthi basukume balime imibhida ngoba ilenzuzo enengi njalo ayidingi mali enengi ukuthi umuntu aqalise ukuyilima.
“Umuntu olendawo yakhe uyenelisa ukuthi aqale ukulima imibhida engakhiphanga mali kodwa ayithengise imuphe inzuzo enhle.
“Imibhida ivuma emhlabathini ovundileyo kodwa akudingakali ukuthi abalimi bakhuphe imali yokuthenga imithi yokuvundisa umhlabathi ngoba abalimi balakho ukusebenzisa umquba wezibayeni zabo ukuvundisa umhlabathi wabo,” kutsho uNkszn Ncube.
Uqhubekele phambili wathi ilizwe lomile ngakho-ke abantu kabangahlaleli izandla, kabakhuthale balime imibhida ngoba ayikhethi ukuthi uyiqala ulemali enengi esikhwameni sakho.
“Ukulima ngenye yemisebenzi yezandla ephathisa abalimi ukuthi bathole imali yokufundisa abantwana. Abalimi sibakhuthaza ukuthi balime imibhida ngoba ayidli kakhulu esikhwameni ngoba loba bengayithenganga imithi yezibungu bayenelisa ukuthi basebenzise umlotha ukuthi ubulale izibungu ezibulala imibhida,” kuchaza uNkszn Ncube.
“Imibhida iyalimeka njalo ngoba ayidingi ukuthi umuntu ayethenga intanga kodwa uyenelisa ukuthi nxa elomakhelwane ahambe ayecela usaba loba amaxhakela ahlanyela imibhida. Imibhida mihle ngokuthi ayiphuzi ukudliwa, iyabe ikhiwa ngapha ikhula, lokhu kwenza abalimi bathole imali masinyane,” kuphetha uNkszn Ncube.
