uMthunywa
Cornelius Luphahla
BEKUNGABIZWA ozwayo ngoLwesihlanu kuviki ephelileyo enzikini yedolobho lakoBulawayo lapho obekulomkhosi wokuvula ikolitshi labadlali bezokuzithokozisa iCollege of Creative Arts — Africa.
Ikolitshi leli liyingxenye yeMidlands State University noma nje limele kakhulu izifundo zabadlali bezokuzithokozisa ngenhloso yokuthuthukisa ezamasiko kanye lezokuthokozisa uzulu.
Ikolitshi leli njengoba livulwe ngaphansi kweMidlands State University kukhangelelwe ukuthi lifundise izifundo zonke ezitholakala kule iyunivesithi ngenhloso yokuphungula umango kulabo abahlala koBulawayo kumbe kwezinye indawo eziseduze lakoBulawayo kodwa befuna ukufunda kule iyunivesithi.
Ekhuluma kulumkhosi obemele uVice Chancellor weYunivesithi le uDokotela Advice Viriri uchaze ukuthi okwenza bavula ikolitshi le koBulawayo yikuthi yikho okugcwele khona abadlali bokuzithokozisa bakoMthwakazi kodwa beswela ulwazi olujulileyo.
“Sinanzelele ukuthi iBulawayo lidolobho elibambe ezamasiko ngakho abadlali abanengi lapha baswela ulwazi olungenza bathuthuke. Ngokuvula kwethu ikolitshi le silethemba lokuthi bazabuya bezothuthukisa ulwazi lwabo kwezokujabulisa uzulu.
“Okunye njalo sibone kungcono ukuthi sithuthukise izifundo zama-arts njengezeSTEM ukuze wonke umuntu athole ukuzithuthukisa ngalokho akwenelisayo,” kutsho uDkt Viriri.
UDkt Viriri uqhubekele phambili waveza ukuthi bakhangelele ukuthi bathuthukise ilizwe lonke kwezokuzithokozisa.
“Ngalokhu-ke kulezizifundo kuzakuba labafunda iBlock Release, abe-Parallel kanye labe-Conventional. Lokhu sikwenzela ukuthi labasebenzayo abafuna ukufunda basithole isikhathi sokuyafunda,” kuphetha uDkt Viriri.
