uMthunywa
Bongani Ndlovu
BEKUNGABIZWA ozwayo ngoLwesine ngeviki ephelileyo kuvulwa ngokusemthethweni ikolitshi yababalisi, iBlended Education College of Southern Africa (BESCA).
Ekhuluma lephephandaba likazulu uPrincipal wekolitshi le, uMnumzana Mathamsanqa Dube ongomunye wabasunguli beJoshua Mqhabuko Polytech eseGwanda uthe ikolitshi leli lizaphathisa kuntuthuko yempilo zabantu emphakathini kanye lakumthombo wolwazi.
“Lanxa siyikolitshi entsha kodwa sesilabafundi abadlula i-170 asebebhalisile ukuzoqala izifundo zabo zokuba ngamatitshala emfundo yaphansi.
“Okwakhathesi sithethe abafundi abenze kuhle kuzifundo zabo ze O-level le A-level sikhangele kakhulu isiNgisi kanye leNombolo,” kuveza uMnu Dube.
Uqhubekele phambili waveza ukuba ikolitshi le izabe isebenza njengamanye amakolitshi aselizweni lonke jikelele.
“Njengamanye amakolitshi amatitshala sizakuba lamathemu amathathu ngomnyaka njalo sizabe sibiza abafundi abatsha kanye ngomnyaka ngoZibandlela,” kuchaza uMnu Dube.
Uphethe ngokukhuthaza uzulu ukuba angavilaphi ukuvakatshela emahofisini abo esikolo ukuzothola ulwazi ngokungena ekolitshini le.