Kumwe nekumwe kuna lubaka gwako

04 May, 2017 - 00:05 0 Views

uMthunywa

Tina Notsie Banimasitu
DUMILANI baKalanga, ndohanha hangana namwi mugole leli tilibapenyu. Bamwe tileba takababiganya, bamwe bamuzwibhedlela nebamwe balele kumajele. Ngono iwe nami ini tjinotikona kuti tilumbidze Ndzimu tiboka kuti gole la2017 taba mulili tilipenyu. Ate butjenjebvu gwedu kuti tibe titjila meya nenyama kwakahangana kudzina kuswika lubaka igogu, Ndzimu ndiye wakuta ngono iswi banhu tina nlandu wolumbidza.

Hezwo zwikwele zwenohhugwa kwebaakanyigwa kakale. Kwehakiwa matharanka ebanonda kumabhodingi, mayunifomu, mabhuku, mathayi, masokisi, zwinokwalisa kose kwekwele. Banhu bopandiwa nemiholo bamwe nehaya kuyi mali ndoyiwana poni ibo baka besekelela bedla zwinozipa ben’wa makhokhokhola kugutiwa nasi kwatini?

Kumwe nekumwe kuna lubaka gwako. Igogu lubaka ndegobaakanyila yenda kukwele. Khisimusi takabaakanyila tikanyobola dzinyama tikakumba kukapinda nasi tobaakanyila kumwe. Ape kogala kuliKhisimusi pakutanga kwegole lidzina linopela koba kodan’wa kuyin’wi?

Banonda kumabhodingi musinozana ka ngobe mali dzinolipiwa dzogwadza dusa musamba. Kakale musiti motatiwa mudzin’umba, kotigwa kuti muwane lubaka gobala mabhuku enyu kusina kumwe kunowomudula muzila. Ibaba banoti bebva kukwele kuyi bhika hadza, ngudza ndilo, awutokhwa bgwisa gwamangwana, yenda kanomwe lonohwa kusina kwekwele kwatiwa wanyala zwo wolala liyedza umuka unda kukwele usatongobhata bhuku. Nhu azwidiye eziba kuti mali ayitonungiwa-ka hama dzangu, inohingiwa zwinolema. Bamwe nhu wakahha akahanhila hhaligwa kwezwikwele kusina tjaabhuda natjo. Nhu asilinge kuti maputi apela muthiranka ngono pakunonoswika mwedzi unohha ndoba ndilipani pahhala yeyi. Linga bhuku mbeli ukozuwa nehhala wezwihingila  usitjina mihubo nemaputi.
Mubabaakanyile ntja nhu asinohhula zwikwele enohwa ezana ekonobuya nabopori kuyi ndakandisina hetji nahetji.

Mulipe mari dzabosayensi levi nedzinobaka ma-library bahwe bebala badiyiwe babhudilile. Pa mali isipo tengesani kumwe kene kuli zwipfuwo kene zwimun’umba bana bazwidiye ngobe mukasajalo mangwana ape bohinga mokumbila mali mobudziwa kuti “moti ndiyiwane poni mali imwi musakandiyendesa kukwele”. Mubayendese kukwele, nhu anokon’wa yega koga nkoba wekwele ewunziba.

Imwi munonda kukwele, nhu ngaazibe tjaanondisigwa kukwele. Usiti mme bati ndinde kukwele. Akuna nhu unozwidiya eti unotila umwe. Ndohwa ndiwha mme beti “kene ukanda kene ukasanda awuna wawunosudza. Imi ndakazwidiya ntolo ndakapedza kwangu, kwasala whuti Ndzimu anditole koga”. Ukowana nhu akasunda nlomo unonga wehuduntule kuyi ndodziyidziwa kuyi ndiyende kukwele. Kene ukanda kene usakanda butjilo ndegugo ndiwezwo unoba wolila usalobgwa mangwana. Yendesewa kukwele  koba kutigwa butjilo gugo gwamangwana kuti gube gulelu. Ukanobhuda nabopori iswi toti takakundisa kukwele ukanozana zwo, nohwa uvima kuhango.

Mube nekuzwidiya kwakanaka nhu awhilile ndiyi. Ubapindebo nawebo mukilasi usihwe upindiwa nebamwe tjoselele.

Kalanga Language and Cultural Development Association
[email protected]

Share This:

Sponsored Links