uMthunywa
Cornelius Luphahla
KWENZAKALE insindabaphenduli yendaba esigabeni seMalaba eLupane ngemva kokuba eyinye indoda ibanjwe xhaka igcine umayelane esiphaleni obesehluphile ngokugebha amabele emasimini abantu.
Insumansumane le yenzakale emavikini amabili aphelileyo lapho uMnumzana Mehluli Ncube akhutshelwe khona umayelane esiphaleni ngabaphurofethi akade bebizwe yizakhamizi zakule indawo ngoba seziphelelwe ngamabele, uMthunywa uyakuveza lokhu.
Ekhuluma loMthunywa uNkosazana Girlie Dube omunye wezakhamizi zakule indawo uchaze ukuthi umayelane lo ubesehluphile esigabeni.
“Umayelane lo ubesesithwalise nzima esigabeni ngoba mina ngikhuluma nje ungiqedele indima ezintathu zomumbu.
“Isimanga yikuthi umayelane lo ubesegebha ngitsho lenyawuthi kanye lamabele. Yikho okade sokumangalisa ngaye kanti ngowomuntu,” kuveza uNkszn Dube.
UMthunywa ubuye njalo wenelisa ukukhulumisana loMnumzana Mbonisi Ndlovu ongesinye isakhamuzi sakule indawo waveza njalo ukuthi umayelane lo ubengabanjwa ungaze umthiye.
“Mina okwenza ngasola ngokwenza kukamayelane lo yikuthi wawuthi ungaze umthiye engabanjwa njalo besisithi nxa simladela ekuseni sihambe size sidinwe.
“Obekusethusa yikuthi umayelane lo ubethi engafika kwesinye isihlahla unyawo lwakhe lunyamalale. Yikho-ke okudale ukuthi sidinge abaphurofethi ngoba besesiphelelwe ngamabele,” kutsho uMnu Ndlovu.
UMnumzana David Nkiwane ubikele njalo intatheli ukuba abaphurofethi laba bathi befika bahle bamqamba umnikazi kamayelane lo.
“Bathi befika abaphurofethi laba basitshela umnikazi kamayelane lo oseqedele abantu amabele bachaza njalo ukuthi angawathatha uwahlanzela esiphaleni.
“Babuya bachaza njalo ukuthi umayelane lo seleminyaka ethile wabakhona kodwa okudala ukuthi ahluphe kakhulu lonyaka yikuthi ulabantwana ngakho ubephathela labo amabele la.
“Okubuhlungu yikuthi abaphurofethi laba bachaza ukuthi abantwana bakamayelane lo babaleka bayangena emlindini okudale ukuthi bengababambi. Asazi kumbe abantwana bakhona labo bazasala besihlupha njalo,” kuchaza uMnu Nkiwane.
Umnikazi kamayelane lo kubikwa wathi ebuzwa ukuba wamthatha ngaphi wachaza ukuthi wamtshiyelwa nguyise.
“Umayelane lo ngamtshiyelwa ngubaba ngakho lingamtshisi ngoba uyanginceda kakhulu. Nxa limtshisa kutsho ukuthi lami ngizasala ngibulawa yindlala. Kungcono ngoba abantwabakhe babalekile bobabili ngakho bengakhula bazangisiza”.
Usobhuku wakule indawo uMnumzana Mtshokotsho Tshuma uchaze ukuthi indaba le uyayazi njalo yenzakala.
“Indaba le ngiyayazi njalo yenzakala esigabeni sami ngakho isigaba yiso esabiza abaphurofethi laba abakhipha umayelane lo esiphaleni leso,” kuphetha uSobhuku uTshuma.
