uMthunywa
Johas Moyo
KULENDODA ehlala esigabeni seBinga ngaphansi kweNduna uSinakoma emiswe phambi kukamansthi weBinga isetheswa icala lokuzindonsela amanzi ngomsele ngemva kokubhaxabula abazali bayo yalimaza unina omncane kubangelwa yimpikisano, ukungaboni izinto ngaso linye nje.
Umsolwa uTobias Munkombwe oleminyaka engu-40 yokuzalwa umiswe phambi komthethwandaba weBinga esetheswa icala lokutshaya uyise lonina omncane uMusiyi Ndlovu oleminyaka engu-56 wamlimaza. Kubikwa ukuthi umsolwa wasebenzisa inqindi ekutshayeni kwakhe uyise lonina omncane .
UMtshutshisi walelicala uMnumzana Bruce Maphosa ubikele inkundla ukuthi mhlaka 8 kuNkwenkwezi lonyaka umsolwa ohlala kowakhe umuzi waxabana labazali bakhe ngemva kokungazwisisani wazonda waganunwabu wabhaxabula uyise lonina omncane ngenqindi.
“Uninomncane uthe esewele phansi waqhubeka emkhahlela ngamandla amakhulu waze walimala umzimba wonke njalo wenyela intamo wacina ethwalelwa esibhedlela lapho ahlolwa kwabonakala ukuthi ulimele kakhulu njalo ulimele langaphakathi.
Umsolwa ulivumile icala lakhe phambi kuka Mantshi uAilene Munamati yena ombuze ukuthi watshayelani abazali kangaka aze abalimaze.
Ngomzamo wokuzivikela umsolwa uthe wayedakiwe ngalelolanga njalo kasakhumbuli ukuthi kwenzakalani ngoba waphangisa wazonda wehluleka ukuzibamba.
Umantshi umgwebe inyanga ezingu-18 kodwa wephulelwa eziyisithupha. Umsolwa uzadonsa inyanga ezilitshumi lambili esebenza gadalala ngoba umantshi ubike ukuthi ingqondo yakhe ibolile njalo kalandawo elungileyo kumphakathi kusafanele ake ahlale ejele.
Umantshi uphethe ngokukhuza umsolwa ukuthi abazali kabatshaywa loba usucaphuke njani ngoba uzokhela amalahle ekhanda ngesenzo esinjalo.
