Uncategorized

Kugalula abafundi 2 bevela esikolo

24 Nov, 2022 - 00:11 0 Views
Kugalula abafundi 2 bevela esikolo begalula

uMthunywa

Thokozile Mbedzi

KUQHUME isililo kwaba lusizi kutholakala izidumbu zabafundi ababili besikolo se-Osabeni Primary, ePlumtree ngeviki ephelileyo begalule emfuleni uGubungano.

Kubikwa abafundi ababili laba oleminyaka engu-6 loleminyaka engu-8 abahlala ngaphansi kwenduna uWasi, bebevela esikolo baze bangene emfuleni lo, basebegalula. UMthunywa uzwe ukuthi abafundi laba babebathathu bevela esikolo bathi befika kumfula lo ababili bahlubula ama-unifomu abo bangena emfuleni baqala ukubhukutsha.

Kubikwa bathi belokhu bebhukutsha bagalula, umngane wabo uthe ebona engasababoni wagijima waya ngakibo wayabikela abadala ukuthi abanye bakhe bebebhukutsha kodwa kasababoni.

Kubikwa izakhamizi zaphanga zayahlola zenelisa ukukhipha izidumbu ezimbili andubana kubikelwe amapholisa ngendaba le.
Omele isikhulumi samapholisa esabelweni seMatabeleland South u-Assistant lnspector Thandolwenkosi Moyo usiqinisekisile isehlakalo sokwedlula kwabafundi ababili ngemva kokugalula emfuleni.

“Amapholisa amukele umbiko wokugalula kwabafundi ababili bevela esikolo kuviki ephelileyo.
“Sixwayisa uzulu ukuthi njengoba isikhathi sezulu sesiqalisile kabaphelekezele abantwana esikolo ukuze babone ukuba bavikelekile.

“Ababalisi labazali labo kabafundise abantwana ngezingozi zamamzi njalo babaxwayise ukuthi bangangeni emanzini bengela abaqeqetshe kwezamanzi.”

Share This:

Sponsored Links