uMthunywa
Thokozile Mbedzi
ZILOKHU zinkemile izakhamizi zesigabeni esingaphansi kwenduna uNyajena eMasvingo kulandela ukuzwa ngezelamani ezithelele umfowabo obesilwa lonkosikazi wakhe zamtshaya okubangele ukuthi alimale afe.
Kuzwakale ukuthi mhlaka 4 kuyonale inyanga, uWitness Nyumo oleminyaka engu-30 yokuzalwa wangena ekamelweni lakhe lokulala lonkosikazi wakhe bathi bephakathi baba lokungazwisisani okwabangela ukuthi umkakhe ahlabe umkhosi edinga usizo okwenza abafowabo bomkakhe, uWiseman lo Titus Nyumo oleminyaka engu-28 bagijime beqonda ekamelweni labo besiyalamula.
Kubikwa uWitness waqala ukulwa labafowabo wasetshelela wawa watshayeka ngesiphundu okuyikho okwabangela ukuthi afe ngemva kwensuku ezimbili.
Ekhuluma lentatheli kaMthunywa uMnumzana James Mpofu uthe lokhe elesithuli ngokwenzakeleyo.
“Asazi ukuthi kungene moya bani ngoba uWitness nguye owaqala ukuyalala lomkakhe baqala ukuxabana umkakhe wahlaba umkosi ecela ukuba kabamsize. Abafowabo uWiseman loTitus bathe befika umnewabo uWitness wahle wabaphendukela waqala ukulwa labo. UWiseman wasethatha uswazi watshaya umnewabo uTitus laye ethelela emtshaya ngezandla okwabangela ukuthi uWitness atshelele awele embhedeni ngesiphundu wahle waqaleka.
Kubikwa mhlaka 5 kwamqinela waze wathwalelwa esibhedlela seSvovic lapho abamdlulisela phambili eMasvingo Provincial Hospital lapho aphinda wahanjiswa ku-24 Hour Clinic lapho abhubhela khona mhlaka 6.
Udaba lolu lwabikelwa amapholisa.
Isikhulumi samapholisa esabelweni seMasvingo uInspector Kudakwashe Dewa ebuzwa ngodaba lolu uvumile wathi solufikile ehofisini yabo.
“Udaba lwendoda efe ngemva kokutshaywa ngabafowabo belamulela unkosikazi wakhe solufikile ehofisini yethu ngakho sikhuthaza uzulu ukuthi nxa kusuke kwaba lengxabano kaxazulule inkinga ngesihle hatshi ukwenza udlame,” kuphetha uInsp Dewa.
