uMthunywa
YiNtatheli kaMthunywa
ILOKHU ibambe izifuba imuli ehlala kwelinye ipulothi eUppper Rangemore koBulawayo ngemva kokuba oguluva ababili bedubule unogada babaleka lemali ngeviki ephelileyo. Kubikwa oguluva laba bathe bebona omunye ohlala kulelo pulothi efika baqhamuka emnyameni bamhlasela bethi kabaphe imali.
Umamangala kubikwa kazange abaphikise, uphange wabaqhubela isikhwama esilemali engange US$8 000-00 leZAR120 000 oguluva bacina betshiya bedubule unogada. Ekhuluma lentatheli kaMthunywa uAssistant lnspector Nomalanga Msebele uthe kulendoda ehlaselwe ngesikhathi isehla emoteni.
Imali
“Kulendoda ehlaselwe ngoguluva ababili ngesikhathi ifika epulothini eRangemore. Umqhatshi kanogada lo ngesikhathi efika ngemota uyehle wasethatha isikhwama sakhe esincane ebesilemali abasolwa laba bahle baqhamuka bamphuthuma bevela emnyameni lapho abahle bathi bafuna imali.
“Laye kazange abaphikise uhle wabapha isikhwama esincane semali. Oguluva laba bambambe ngamandla ukuba bayengena laye endlini bathi befika esangweni undoda lo watshayela unogada wakhe ilihlo emazisa ukuthi uhamba labantu abamthumbileyo.
“Unogada uhle wenza umsebenzi wakhe wazama ukusiza umqhatshi wakhe kwahle kwakhala imibhobho.
“Umqhatshi kubikwa uhle wathola ithuba lokubaleka wangena endlini, unogada basala bemdubula emlenzeni kanye lasesandleni,” utsho njalo.
Uthe abasolwa bahle babaleka lemali yonke. “Amapholisa axwayisa uzulu ukuba engabo hamba ethwele imali enengi ikakhulu ebusuku ngoba lokhu kuyingozi kakhulu.
Ongaba lolwazi ngalapho okungabe kulaboguluva laba sicela abikele amapholisa,” kuphetha uAssistant Insp Msebele.
