uMthunywa
Nomthandazo Ndlovu
ABALIMI bakhuthazwa ukuthi balime umhlobo wendumba obizwa ngokuthi yi-cowpeas inengi labalimi elizazi ngokuthi ngomaqutha ngoba zilenzuzo njalo akukho okulahlwayo nxa zivunwa.
Ekhuluma loMthunywa uNkosazana Senzeni Dube ongumlimi uthe indumba lezi ziyadlisa okwamagama nxa zilinywe kuhle.
“Omaqutha zindumba ezivame ukulinywa ngabalimi bemaphandleni njalo ziyimihlobo etshiyeneyo, eziphangisa ukuvuthwa leziphuzayo.
“Okuhle ngendumba lezi yikuthi lapho sezivuthiwe akula okulahlwayo, konke kuyadliwa, amahlamvu azo inengi labalimi liyawakha lenze umbhida abantu abajayele ukuwubiza ngokuthi ngumbhida wendumba,” kuchaza uNkszn Dube.
UNkszn Ndlovu uqhubekele phambili wathi omaqutha abafani leminye imihlobo yendumba ngoba ezinye indumba nxa sezivunwa okusebenzayo zindumba lezo kuphela.
“Indumba lezi azihluphi ngitsho, ziyavuma emhlabathini yonke njalo akulakuthi ngumhlabathi onjani, umlimi uyasithola kuphela isivuno esithe xaxa,” kutsho uNkszn Dube.
Omunye umlimi othe unguSibangani Mpofu olima esendaweni yeSigodini uthe ubuhle bendumba lezi yikuthi ziyavuma loba ngasiphi isikhathi somnyaka.
“Omaqutha zindumba ezilenzuzo sibili, mina ngiyazilima loba ngasiphi isikhathi somnyaka, ziyavuma kuphela.
“Okunye okuhle ngazo yikuthi azidingi lezulu elinengi, njengeMatabeleland South yizo-ke abalimi asebengazilima ngoba esabelweni lesi izulu kanye lamanzi kuyasilela,” kuchaza uMnu Mpofu.
“Abalimi kabazame ukuzilima indumba lezi bangagxili ku-sugar beans kuphela, lalezi indumba ziyadlisa ngoba abantu konke lezifuyo kuyathola okokudla kizo, indumba lezi zilakho njalo ukutshiya ukudla okuhle emhlabathini,” kuphetha uMnu Mpofu.
