uMthunywa
NguEthel Ncube
ATSHONELWE lilanga amasela abetshontsha ngozwane koBulawayo laseMguza ngemva kokubanjwa ngabeCriminal Investigation Department kwadutshulwa oyedwa ngoMvulo kuyonale iviki.
Kuvele ukuba ometheswacala ababanjiweyo bane, abanye abakatholakali. Izigelekeqe lezi besezitshontshe imali efika US$1 529 leR1 650 kusukela ngoMabasa kuze kufike kuyonale inyanga kaNkwenkwezi. Amasela la kubikwa atshontshe endaweni ezibalisa iCouncil for The Blind, Lovedale kanye leMguza.
Kubikwa umetheswacala uVusumuzi Mguni oleminyaka engu-24 yokuzalwa wahamba wayatshontsha komunye umuzi koSigola, eMguza okwadalwa ukuba abanjwe abotshwe waseqamba uProsper Moyo owaziwa ngokuthi Professor, Prince Dube, Mukaya kanye loUyapho Ndlovu osejele eKhami. UVusumuzi wakhokhela amaDetectives aya eHawkflight lapho okwafika kwatholakala uNkazimulo Ndimande Nyoni obotshwe ngemva kokudutshulwa umlenze wathwalelwa esibhedlela sakoBulawayo lapho alaliswe khona.
UVusumuzi waphinda wakhokhela amaDetectives ukuba kubotshwe uMbekezeli Moyo oleminyaka engu-33 yokuzalwa, Andile Moyo oleminyaka engu-25 labo laba basolelwa emacaleni okutshontsha behlomile. Ngesikhathi bebanjwa kutholakale ingubo, imbiza zakoKango, ukudla kanye lezinye impahla eziqakathekileyo.
Amapholisa ekhasini labo leTwitter aveze ukuba acela ongabe elolwazi ngalabo abaqanjiweyo kodwa bengabanjwanga azise amapholisa ngokuphangisa.
“Sicela uzulu ongabe elolwazi mayelana labometheswacala laba uJB, Prince Dube, Prosper Moyo owaziwa ngelokuthi Professor loMukaya azise amapholisa kunombolo ezithi 0242 703631 or athumele umlayezo kuWhatsApp kunombolo ezithi 0712 800 197.”