uMthunywa
Khanyile Ndebele
KULAMADODA amane akoBulawayo amiswe phambi komthethwandaba weTredgold koBulawayo esetheswa icala lokutholakala elophondo lwendlovu.
USimbarashe Mutsawu (36), uGad McDonald Brewer (27), uTabona Mzizi (37) kanye loCalvin Edward bamiswe phambi komthethwandaba kuviki ephelileyo ngemva kokutholakala belophondo lwendlovu.
Umtshutshisi uNkosikazi Portia Mashazhu uveze ukuthi abasetshi mhlaka 3 Nkwenkwezi kuwonalo umnyaka ngehola lesithathui ngemva kwemini bathola udletshana lokuba abane laba balophondo lwendlovu njalo banikwa lohlobo lwemota abahamba ngayo le-number yayo.
Abasetshi laba bathi bafika eSouth World Shopping Centre lakanye bayibona imota le bayimisa basebezitsho ukuthi bangobani andubana bahlole imota le.
Kubikwa phakathi kwemota kwatholakala uphondo lwendlovu lugoqelwe ngethawulo luphethwe nguMutsawu, kukanti umsolwa wesibili uBrewer wayephethe isikali, umsolwa wesithathu uMzizi wayetshayela.
Kubikwa abane laba bacelwa ukuthi baveze icence loba i-permit ebanika imvumo yokuthi bathwale uphondo lolu kodwa behluleka okuyikho okwabangela ukuthi babotshwe.
Kwathathwa uphondo kunye lesikali ukuze kugcinwe njengobufakazi.
Uqhubeke waveza ukuthi abasolwa bahanjiswa eCID Mineral Flora and Fauna lapho abafika babuzisiswa ukuba baluthethe ngaphi uphondo lolu njalo uMzizi waveza ukuba wayelunikwe nguEdward okwabangela ukuthi abotshwe.
Umantshi uNkosikazi Nomagugu Maphosa udlulisele phambili ukuthoniswa kwecala leli kumhlaka 19 Nkwenkwezi njalo bazabuya bevela esitokisini.
