uMthunywa
Ethel Ncube
LOBA kusabalale imbiko yokuba kulomntwana ongumfana oleminyaka engu-13 oxotshwe ngunina osendele kwenye indoda kunkundla zokuxhumana sokuvele ukuba umntwana lo kazange axotshwe ngunina kodwa ulomkhuba wokuthi angahlala endaweni uyadakeka abasebaleka ayehlala lesinye isihlobo.
Umntwana lo uPrince Sayi kubikwa udingwa yizihlobo zakhe ezikuleli ngoba zithi sezimbonela kunkundla zokuxhumana nje azazi ukuthi ungaphi okwakhathesi.
UPrince kubikwa uzwakalela eGokwe yiloba kungaziwa ukuthi uhlala lobani kungakho izihlobo zicela ukuncediswa ukudinga lumntwana.
UMthunywa uxhumane lesinye isihlobo sikaPrince oveze ukuba umntwana lo uhlala ebaleka adingwe, angabonakala aphinde abaleke njalo.
“Umntwana siyamdinga akasimboni sibona ngemifanekiso kunkundla zokuxhumana.
Unina loyise behlukana liqiniso kodwa ukuthi umntwana lo uyahlutshwa ngamanga khathesi ubehlala logogo wakhe eGokwe wabaleka. Sikhonapha nje siyamdinga simbona egqoke impahla zesikolo kumfanekiso wenkundla zokuxhumana kodwa thina njengezihlobo asazi ukuthi ungaphi njalo lokuthi ukubani. Sicela okwazi ukuthi ungaphi asisize,” kubika isihlobo sikaPrince.
Ekhuluma lentatheli umzawakhe uNkosazana Prudence Sayi kaPrince uveze ukuba bayamdinga abamtholi.
“UPrince sasihlala laye khonapha eFilabusi ehlala ebaleka ethi uyahlutshwa. Khathesi ubesehlala logogo wakhe ozala ubaba laye usembalekele sesimbala kubofacebook kuthiwa ukhona.
“Njengezihlobo sicela usizo kulo omgcinileyo ngoba sesibuze emapholiseni eGokwe ukuba kukhona na umuntu obuye wathi ugcine umntwana angamaziyo bathi akulandaba enjalo. Umuntu omgcinileyo kazivezi ukuthi ungubani sibona ngomntwana egqoke iyunifomu yesikolo seChedza.
Okwakhathesi sisazama ukuthi sixhumane lomphathisikolo wakhona sizwe ukuthi uPrince ufunda khonangale na. Ombonayo sicela abikele amapholisa aseduzane laye ukuze lathi sihlaliseke,” kuphetha uNkszn Sayi.
