uMthunywa
Pumulani Mpofu
UMHLABA esiphila kuwo ulezinkinga lezinhlupho ezisihlukumezayo njalo zihlukumeza abantwana abancane okumele ukubana babe benakekelwa ngabazali babo. Inengi labazali sebesifa betshiye abantwana bezintandane, obaba sebephika izisu betshiye omama bebakhulisa bebodwa kungekho muntu ongabaphathisa.
Ogogo abanengi sebesala begcina intandane.Umhlaba usumi manzonzo ngoba lemisebenzi iyaswelakala kube nzima ukubana babakhulise ngendlela enhle ngoba bengenelisi ukubahambisa esikolo njengabo bonke abantwana. Kusuka kube lukhuni ngoba inengi labazali bangabhubha abathathelwa lezincwadi zokufa ngoba izihlobo zicina sezibanga indaba zokubana ubaba wabantwana wayengakhiphanga amalobolo.
Lobu budlwangudlwangu budala ukubana abantwana bacina besala ezandleni zezihlobo zakobaba ezingelawo amalungelo okuthathela abantwana izincwadi zokuzalwa. Inengi lezintandane kazilancwadi zokuzalwa ngoba izihlobo ezisaphilayo kazinaki kangako ukubana zisize intandane ngoba kulendaba abazibangayo labo sebele babo.
Kule iviki ngithole ithuba lokuxoxisana logogo okuthiwa nguSikholiwe. USikholiwe wayelendodakazi yakhe eyodwa okuthiwa nguSizwile. USikholiwe wabeletha indodakazi yakhe wayitshiyela unina ukubana ayigcine yena esiya eGoli ukuze athole ukuziphilisa njalo asebenzele indodakazi yakhe.
USizwile wakhula-ke wacina ethathiswe incwadi yokuzalwa ngugogo wakhe ozala unina ngoba uSikholiwe wayesehambe waphulula eGoli. USizwile wakhula-ke wathola abantwana abathathu kodwa kubobaba abatshiyeneyo.
Wahamba wayazihlalela labo kubomakorokoza waze wabuya esegulela ukufa. Kahlalanga nsuku ezingaki wabhubha etshiya umntwana wakhe omncane esasebeleni. Ekufeni kwakhe uSikholiwe wadabuka kakhulu ngakho kazange asazihlupha ngokuthathela umntwana wakhe incwadi yokufa. Kwatshova iminyaka abantwana bakhuliswa nguSikholiwe owaye ngugogo ozala ngunina.
Njengoba kusaziwa ukubana ngomthetho kuqakathekile ukuthi abantwana bangene esikolo besebenzisa izincwadi zokuzalwa, ugogo uSikhonzile kwamhlupha weza eTrinity Project ngemva kokubana ehlangane lezisebenzi zeTrinity Project kwamanye amakilinika esihamba sifundisa khona ngendaba zencwadi zokuzalwa. Okwakuqala ugogo kwakumele ayethatha ama-birth confirmation record. Njengogatsha lweTrinity samnikeza imali yokuyathatha lezincwadi esibhedlela.
Kwakumele njalo ayethatha incwadi zesikolo kanye lamakhadi esibhedlela. Engakayi kuyathatha incwadi zokuzalwa kwakumele abe lencwadi yokufa kwendodakazi yakhe.Waqonda koMsitheli ethwele incwadi yokungcwaba, izihlobo zakhe ezimbili kanye le $2 yesidindo ukuze athathe incwadi yokufa kukaSizwile. Waphumelela ukuthatha emva kwalokhu waqonda-ke koMsiteli ukuyathathisa abazukulu bakhe incwadi zokuzalwa.
Ngiloba nje zonke lezintandane sezathatha incwadi zokuzalwa njalo sezilamalungelo abo sezisahamba esikolo zifunde zigcine ugogo wakhe. Masihlaleni ethembeni silungisele abantwana ikusasa elihle .
Kasihlanganeni njalo kuviki elizayo.
Umlobi utholakala kukheli ethi [email protected] loba kunombolo ezithi 0773195055.
