uMthunywa
Ethel Ncube
KULABABALISI besikolo esiseMbalimbali eTsholotsho asebekhalaze ngokuhlukunyezwa ngabafana besigaba nanko phela kubikwa bayabatshontshela impahla zabo babathethise kuthi abanye labo babahlukumeze ngokocansi.
i abuse
Kubikwa induna uGampu ize yabiza osobhuku beziqinti ezitshiyeneyo kulindawo ukuze bazochaza ukuba kungani izigangi lezi okukhulunywa ngazo zingabotshwa.
Induna uGampu weTsholotsho
UMthunywa uxhumane lesinye isakhamuzi sakhonale uMnumzana Velaphi Ndlovu oveze ukuba ababalisi bakulindawo bathwele amagabha avuzayo ngenxa yabafana abangamahlongandlebe asebakubona kufanele ukuthi benze abakufunayo esigabeni.
“Okulapha kunzima kakhulu siswele lokuthi siqale ngaphi. Kulexuku labafana abangezwayo kakhulu okokuthi selizibona angani lingenza umathanda esigabeni.
“Abafana laba bayabuya entubeni yesikolo bathathe abantwana abangamankazana ngenkani bahambe labo. Abantwana laba bacina befika ngekhaya sokumnyama. Ukuthi bayabe besenzani lathi njengabazali siyazibuza kodwa siyiswele impendulo.
“Nxa sibabuza abantwana ukuthi bayabe bengaphi kabakhulumi lutho ngoba bayabe bethuselwe ukuthi bazabulawa bengakhuluma. Esesikwesabela yikuthi sizacina sibona abantwabethu sebezithwele singekela lokhu kuqhubeka kusenzakala.
“Abafana laba badelela lababalisi bethu besifazane, uyathola bebathethisa kuthi kwezinye izikhathi bababambe izitho zomzimba ezihloniphisayo.
“Imbuzi zabanye ababalisi seziphelile ziqedwa ngabafana laba. Nxa bengabotshwa uyabona sebephandle futhi babuyele ekudaleni amacala la njalo,” kubika uMnu Ndlovu.
UMthunywa uxoxe lenduna uGampu ngaloludaba waveza ukuba ubebize osobhuku ukuze bahlafune udaba lwabafana laba asebehluphile.
“Ngibize osobhuku bonke lapha ngabatshela ukuba okwenzakala esikolo besekela abafana labo beganga bona bekwazi bezithulela angifuni kukuzwa, abahambe beyekulungisa ngoba abantu bakhona bayazakala. Abantwana abangamankazana kumele bavikelwe kunye lababalisi ngakho konke esilakho.
“Bazafunda njani, lababalisi bafundise njani behlutshwa ngabantu esigabeni? Lokho kumele kuphele. Kulumhlangano sikhethe ikhomithi ezakhangela ngezigelekeqe lezi. Ikhomithi le izakhangela njalo ngomsebenzi wokubuyiselwa kocingo lwesikolo olwakhitshwa yizigangi,” kuphetha induna uGampu.
