uMthunywa
KUHLWE emini kuzelamani zakoButhelezi, eGengeni, eMtubatuba, zibotshelwa ukutshaya, zigwaze ngomkhonto zibulale isinganina (stepmother) ngeledlule, ngoba zithi masikhiphe imali kayise ongasekho, eyaphuma emsebenzini esaphila.
Kubikwa ukuthi uNkosazana Cashile Buthelezi (50) lomfowabo uSibusiso Buthelezi (39) abebevele enkantolo yeMantshi yeMtubatuba ngeledlule bambulala nje unina, uNkosikazi Sibongile Buthelezi (63), baqale bamqhuba bamusa ebhanga beyobheka ubuqiniso kwabekutsho ukuthi kayikho ngempela imali eyatshiywa nguyise.
Konke lokhu kuthiwa bakwenze phambi kwezingane zikaNkkz Buthelezi eleminyaka engu-17, olengu 21 lole-29. ILANGA likhulume lo Nkkz Nombulelo Nzama, oyindodakazi endala kaNkkz Buthelezi, ayithola ngaphambi kokutshadela kwaButhelezi, othe kuze kube yimanje.
Akazi ukuthi abasolwa bebengenelwe yini ngoba unina nguye obekhulisa abantwababo (abasolwa). “Ezinsukwini ezimbalwa ngaphambi kokuba kwenzeke lesi sigameko, ngifonelwe ngumama ethi utshaywa yizona lezi zingane zikabab’ uButhelezi. “Ngizifonele ngazitshela ukuthi ngicela zingamtshayi, uma zingasamdingi emzini womyeni wakhe ngizomthatha mina ngiyohlala laye eGoli lapho ngilomuzi khona,” kutsho yena.
Uthe abekwazi yikuthi abasolwa bakubanga lonina, yizinkomo ezatshiywa nguyise, abebezithengisa ngaphandle kokumtshela ngoba bethi ngezabo. “Umama ubethi uma engibikela ngalokho, ngithi kabayekele bazithengise, bayidle imali yazo, akulalutho.
“Baphinde bamlwisela ugandaganda obusegcekeni ungasasebenzi, bethi bafuna ukumthengisa, lakhona ngathi makabayeke. “Ukuthi bambulalelani-ke manje, nami kangazi ngoba lasebhange kuthiwa batsheliwe ukuthi uyise wayikhipha kudala imali yakhe, wayidla,” kutsho yena.
Kuthiwa ngosuku lwesigameko, abasolwa batshele uNkkz Buthelezi ukuthi uzoyikhipha imali lapho ayifihle khona ngoba iyifa labo. UNkszn Buthelezi kuthiwa ubalekile ngosuku lwesigameko, wabuya ngakusasa waziqhubekela ngempilo nje kwangathi kakukaze kwenzeke lutho. Kuze kwaba ngomakhelwane ababize amapholisa wabotshwa, wathi yena akakaze abaleke kubo, ubekhona kodwa futhi lesigameko esehlele inkosikazi kayise akasibonanga.
ILANGA lithole ukuthi yizingane zakhe ezikuvezile ukuthi nguye lomfowabo abalimaze umufi. Kuthiwa bebemgwaze emzimbeni lasekhanda. “Kuyimanje akekho umuntu ozosala lezingane zakhe ngoba ubezizala azitshiye kumama. Ubulawa nje, wayesanda kungixoxela ukuthi ubethengele lona ofundayo izicathulo zesikole ngoba engelazo, kodwa bona bambonga ngokumbulala,” kutsho uNkkz Nzama.
Icala labasolwa lizobuyela enkantolo ngomhlaka-18 kuLwezi. Okhulumela amapholisa Kwa-Zulu-Natal, uConst Thenjiswa Ngcobo, ukuqinisekisile ukubotshwa kwabasolwa, wathi babhekene lecala lokubulala kanti bayinqabile ibheyili.
