uMthunywa
Thokozile Mbedzi
KULEXHEGU lesigabeni sikaVillage 14 eFilabusi elileminyaka yokuzalwa engu-81 elife ngemva kokulunywa zinyosi.
Umuyi uThembo Malinga (81) ufe ngeviki ephelileyo ngesikhathi eselula inyawo egumeni lakhe.
Intatheli kaMthunywa ixhumane lezakhamizi zakulindawo zona eziveze ukuba kazilamathe ngamashwa ehlele imuli yakoMalinga.
UMnumzana Elias Maphosa ongumakhelwane uthe uMalinga walunywa zinyosi ezasezihlala egumeni.
“Sezwa umsindo uvelela koMalinga sathi sisiyafika wayesecatshe endlini kodwa kukhanya zasezivele sezimlimazile.
“Sihle samthwalela esibhedlela bafika bambhalela imithi efunakalayo sasesihamba laye sisiyathenga kodwa sathi sifika endlini kwamqinela wedlula engakanathi lemithi ayeyibhalelwe,” kutsho uMnu Maphosa.
Omunye njalo umakhelwane oseduze uNkosazana Samukele Mthembo uthe lokhu bemadolonzima ngamashwa ehlela uMalinga.
“Kusizwisa ubuhlungu ngoba umuntu omdala ulunywe zinyosi wadlula emhlabeni,” kubika uNkszn Mthembo.
Isikhulumi samapholisa esabelweni seMatabeleland North uAssistant Inspector Nkosilathi Sibanda ebuzwa ngalindaba uvumile ukuthi yabikwa emapholiseni.
“Samukele umbiko wexhegu elilunywe zinyosi lafa. Sixwayisa uzulu ukuthi nxa kukhona okuyingozi endaweni abahlezi kizo bazise amapholisa aseduzane labo masinyane ukuze baphephe engozini ezifana lale,” kutsho uAsst Insp Sibanda.
“Sixwayisa abantu ukuba bangehlelwa zingozi baphangise baye ezibhedlela njalo bakhulume iqiniso kwabezempilakhahle ukuze kungabi lengozi efana lale,” kuphetha uAsst Insp Sibanda.
