uMthunywa
Nkosilath Sibanda
KULIVIKI isizwe sikaMthwakazi sizakhumbula iNkosi uMzilikazi.
INkosi uMzilikazi yakhothama mhlaka 9 Mpandula ngomnyaka ka-1868.
Loba kuyisikhathi se-Covid 19 esingavumeli ukubuthana, uMzilikazi uzakhunjulwa ngumhlaba wonke kumalanga alandelayo.
Umqondisi wenhlelo kunhlanganiso yeMthwakazi kaMzilikazi Cultural Association uMnumzana Rodgers Vuthuza Mthethwa uthe: “Sihlonipha ukuba khona kweNkosi. Injongo yikukhumbula iNkosi eyadabula isizwe uMzilikazi kaMatshobana njengeminyaka yonke,” kutsho uMnu Mthethwa.
Eminyakeni edluleyo, inhlanganiso yeMthwakazi kaMzilikazi Cultural Association ibisenza umgubho eMhlahlandlela, lapho obekubuthana khona abantu kukhunjulwa iNkosi.
Umgubho le, icine ukwenziwa ngo-2019.
Kwakugidwa imihlobo yonke yemigido ngenhloso yokukhumbula impilo kanye lenhlalo yaboMandulo.