uMthunywa
Thando Dube
KULENDODA yakoBulawayo esele ibambe owangaphansi ngemva kokuthi omkayo ababili begwetshwe sikhathi sinye besetheswa amacala okutshontsha.
Amanina la abesebenza ezindlini, uPrudence Mlawuzi oleminyaka engu-18 yokuzalwa loPrecious Mpofu oleminyaka yokuzalwa engu-25 bamiswe bobabili phambili komthethwandaba weWestern Commonage, besetheswa amacala okutshontshela abaqhatshi babo.
UMnumzana Petros Shoko ubikele inkundla ukuthi uMpofu ngoNhlolanja watshontsha imiganu kaNkosikazi Matilda Ndlovu engalingana imali engange $112. Ebuzwa ngecala leli umetheswacala uvumile icala leli, umantshi uMnumzana Lungile Ncube wanquma ukuthi njengomuntu oqalayo ukwenza icala leli ayekwenza i-community service okwamahola angu-105.
Kusenjalo uMnu Shoko uphinde njalo wabikela inkundla ukuthi uMlawuzi watshontshela umqhatshi wakhe uPurity Dhliwayo izigqoko ze$65.
Umtshutshisi ubikele inkundla ukuthi ngoLwesithathu ngeviki ephelileyo uNkszn Dhliwayo ongumqatshi kaMlauzi wancwetshwa indlebe ngumqatshi kaPrecious, uNkszn Matilda Ndlovu ukuthi kulempahla zakhe ezatshontshwa nguMlauzi.
“UNkszn Dliwayo esizwa ukuthi kulempahla zakhe ezibonakale emzini kaNdlovu lapho okwakuhlala khona uMlauzi waphanga wayazikhangela wathola impahla zakhe kanye lezomntanakhe okwabangela ukuthi bahle bayevula amacala loNkszn Ndlovu emapholiseni eCowdray Park.
UMlawuzi ulivumile icala lakhe umantshi waquma ukuthi abhadale i$100 kumbe achithe amalanga angu-90 ephakathi ejele.
