uMthunywa
IMFUNDO esabelweni seMatabeleland South iphezulu kulazo zonke izabelo nanko isikolo seMarula Primary sinqobe kumncintiswano wolwazi obuqhutshwe lugatsha lwezeMfundo lenhlanganiso yeNational Aids Council.
Isikolo seMarula, esisePlumtree, siphakamise udumo lwaso kulumncintiswano wolwazi owenzelwe ePrince Edward eHarare lapho obekulezinye izikolo zezabelo zonke ezilitshumi ngeviki edluleyo.
Inhlonso yomncintiswano lo ibiyikuqinisekisa ukuthi izikolo ziyafundisa ngomkhuhlane wengculazi.
Izikolo ebezincintisana ngezemfundo yaphansi kanye leyaphezulu.
Iqembu linye ngalinye belilabantwana abahlanu.
Abafundi beMarula banqobe kuhlandla labafundi abangezwa kuhle endlebeni besekusithi esemfundo yaphezulu kuloluhlangothi lwabangezwa kuhle endlebeni kunqobe isikolo se Emerald High esiseManicaland.
Abanqobi besikolo esilabafundi abaphila kuhle sikhangele imfundo yangaphansi yiWiro esiseMasvingo besekusithi esemfundo yaphezulu kubafundi abaphile kuhle yiSt. Faith yeManicaland.
Abantwana abanqobe bafika emaphethelweni aluncintiswano baphiwe iUS$100 umfundi munye ngamunye kanye lesikolo besiphiwa njalo eyaso imali.
Isikolo esithethe isicoco sakuqala siphiwe iUS$3000 eguqulwe yaba yisilinganiso esilawulwe ngamabhanga.
