uMthunywa
Ethel Ncube
INKAMPANI ebona ngamandla kagetsi kuleli, eyeZimbabwe Electricity Distribution Company (ZETDC) isiphinde yakhuphula intengo yamagetsi ngesilinganiso esifika ku19,02 phesenti kusukela mhlaka 1 Mbimbitho 2020.
Intengo yamagetsi asetshenziswa ezindlini kubikwa awokuqala ayi-50 kilowatt asekhwele esuka ku 41c/kWh aya ku49c/kWh. Lokhu kutsho ukuthi amagetsi akuqala asezathengwa nge $24,50. Uluhlu lwesibili lwe-150kWh akhwela esuka ku-91c esiya ku $1,08 okwenza abeyi $162.
Ukuthenga kanye amagetsi angu-200kWh ngenyanga sekubiza i$186,50 isuka ku$167 eyakunyanga edluleyo.
Kubikwa kusukela ku201kWh amagetsi ayabe esethengwa nge$4,61.
Intatheli zike zabhoda edolobheni lakoBulawayo kuzindawo lapho okuthengiswa khona amagetsi ezithole izakhamizi zilayinele ukuthenga amandla kagetsi lapho ezikhulumisane loMnumzana Thomas Dube oveze ukuba inkampani yeZesa kumele ivule indlela ezinengi zokuthenga.
“Ubona ilayini inkulu kangaka kwenziwa yikuthi amagetsi bathe bekhweza bangalungisi lamabhanga leEcoCash masinyane ukuthi senelise ukuthenga umuntu ezihlalele endlini yakhe yikho sigcwele lapha. Akuvumi ukuthi uthenge ngefoni yakho, kumele uze ubuye eZesa kumbe uyezama ezitolo ezisedolobheni.
“Sicela balungisise senelise ukuzithengela sodwa endaweni ezitshiyeneyo hatshi ukubuya sizobuthana lapha. Ngikhuluma nje ezinye izindlu ezihlala ogogo abakwazi nxa kuthiwa amagetsi asekhwelile ngamaphesenti abazwisisi bona bafuna ukutshelwa intengo ukuthi yimali engaka,” kubika uMnu Dube.
Intatheli ixhumane lesikhuluma seZETDC uMnumzana Fullard Gwasira oveze ukuba intengo yamagetsi iya ngokuthi usebenzisa njani.
“Ukusebenzisa kwakho amagetsi yikho okukukhokhelela ukuthi uthenga anganani nxa usebenzisa kakhulu amagetsi kutsho ukuthi azakudulela nxa usebenzisa amancane kutsho ukuthi nxa uthenga azabe engcono,” kuphetha uMnu Gwasira.
