uMthunywa
Thando Dube
KULENINA lelokitshini leGwabalanda koBulawayo elimiswe phambi komthethwandaba weWestern Commonage lisetheswa amacala amabili okutholakala lilezidakamizwa.
UMemory Moyo oleminyaka yokuzalwa engu-33 ubotshwe ngamapholisa ngemva kokutholakala elembanje ezingaba yi-180 grams kanye lamambodlela omuthi wokukhwehlela i-broncleer, ovame ukubizwa ngokuthi yiNgoma angu-20.
Umantshi uMnumzana Lungile Ncube uzwe ukuthi mhlaka 18 Mfumfu ngesikhathi sika11 ekuseni amapholisa ancwetshwa indlebe ukuthi uMoyo uthengisa imbanje kanye leNgoma endlini yakhe.
Kubikwa amapholisa afika ahlola endlini yakhe amthola elezidakamizwa lezi okwabangela ukuthi abotshwe.
Ebuzwa emthethwandaba ukuthi uyalivuma yini icala aletheswayo umetheswacala kazange alandule kodwa wazise inkundla ukuthi imbanje kanye leNgoma atholakala elakho wayengakuthengisi kodwa ngokwakhe akusebenzisayo lanxa ababebuya kuye bekufuna wayebathengisela.
Ngemva kokuzwa icala leli umantshi uMnu Ncube uthe kucala lakuqala umsolwa abhadale i$100 kungakafiki mhlaka 30 Lwezi kumbe ayevalelwa ejele okwamalanga angu-60 kukanti kucala lesibili uthe ahlawule i$200 kungakafiki umhlaka 30 Lwezi kumbe ayevalelwa ejele amalanga angu-90.
Umtshutshisi kulelicala bekunguNkosazana Margaret Takawira.
