uMthunywa
KULOMAMA obotshelwe ukuxhwathisa usane lwakhe olusanda kuzalwa enkonxeni andubana alugoqele ngepulasitiki alugqibele.
Lumama oleminyaka yokuzalwa engu-29 ohlala eReitfontein, eduzane leBrits, eNorth West kweleSouth Africa kubikwa ubeke wazama ukukhipha isisu kwehlula.
Ngemva kokunanzelela ukuthi usane lwakhe luyaphila kubikwa inina leli linakane ukulubulala. Isikhulumi samapholisa uLumka Mahanjana uthe ngemva kokunanzelela ukuba usane lwakhe luyaphila umsolwa uthethe usane walugxamuza phakathi kwebhakade le20 litres ebelilamanzi abilayo.
“Uqhubeke wafaka isidumbu sosane phakathi kwepulasitiki. Kukhanya ubesenza konke lokhu elomngane wakhe obemthembise ukuba akasoze atshele muntu ngalokhu abakwenzileyo,” utsho njalo.
UMahanjana uqhubekele phamabili wathi ngoLwesithathu mhlaka 17 Mbimbitho umngane kamsolwa waya emapholiseni wawabikela ngokwenzalayo andubana awatshengise lapho abagqibela khona usane.
Omunye umakhelwane uthe wamangala ebona umsolwa engelamntwana.
“Ngangithi mhlawumbe ngizabona impahla zomntwana zichayiwe phandle kodwa angizange.”
Omunye ongumzawakhe kamsolwa uthe umsolwa ulabantwana ababili njalo bebengacabangeli ukuthi angenza ihlazo elinje.
“Ungumuntu olungileyo, bengingacabangeli ukuthi angenza into enjalo,” utsho njalo.
Isikhulumi samapholisa eNorth West uLieutent-Colonel Amanda Funani uthe umsolwa wagqibela usane lwakhe egodini elingatshoniyo emasimini angakibo.
Uthe umsolwa wabotshwa njalo abantwabakhe basiwe kumnewabo kamsolwa ukuze abakhangele.
Umsolwa umiswe phambi komthethwandaba weBrits. Uzabuya njalo emthethwandaba mhlaka 14 Nkwenkwezi. — Ubulembu
