uMthunywa
Kuyini ukuvunula?
KHULU ngilethemba lokuthi uqine saka. Ngilombuzo lapha. Ngihlala ngibona ubhale izihlahla lemisebenzi yazo kodwa umbuzo wami ubususiba yikuthi kuyini ukuvunula.
Impendulo
Ngiyathaba kakhulu mzukulu, abanengi bangakwenza inhlekisa ngokubuza kwakho wona lo umbuzo kanti kufanele uwubuze. Nxa sesibuya eqinisweni elipheleleyo umuntu wonke wesintwana kuyimfanelo yokuthi nxa kuhlwile esesiya lala uyageza umzimba wakhe ngitsho ubuntu bakhe qho, abugezwa ngesepa ngenye indlela ngingathi udade akagezwa ngesepa nxa sekusiya ekulaleni ugezwa ngezihlahla eziyabe zihlonywe kuye phakathi kwemini yonke. Nxa lezizihlahla ezicoleke kangaka zingeniswe kudade leso senzo yikuvunula noma ukugqokisa udade. Ngemvelo kadade kuba lokutshelela okuthize okumunyathwa yizihlahla lezi eziyabe zivunuliwe. Angamumatha izihlahla lezi kuba lokukholisa okuthize izithandani nxa zisembathana kwenza udade ahlale emutsha. Yiwo umumo opheleleyo njalo uthande kakhulu kubomama abahloniphekayo ngalokhu kuvunula, uzayithola imbali yokuvunula, akukhathalekile ukuthi wena ungaze uthi wena ugezile kodwa uxegisile ekugezeni kwakho ngokungavunuli. Bakhona abantu abalahlekelwa yimizi yabo ngenxa yokuswela imvunulo. Ekuhlanganeni kwababili kumele kube lomehluko phakathi kukankosikazi ovela beletha lonkosikazi oziphileleyo, imizimba yabo ukukhululeka kwayo akufanani kowesilisa. Lokhu-ke yikho okwakungumuzi wakho kudala. Pho-ke lamhlanje sekuthiwa ukuvunula lokhu sokubangela imvukuzane (cervix cancer).
Bayangithanda kumbe bafuna ngisuke?
Ngidinga izeluleko Khulu ngidabukile. Ngileminyaka engu-35 ngisanda kwenda njalo ngilomntwana oleminyaka engu-12 yena owakhe ule-10. Savumelana ukuthi abantwana laba sihlale labo ndawonye njengabantwabethu. Manje Khulu ngisebunzimeni. Eqinisweni mina ngibona angani abantwana ngibaphatha ngendlela efananayo. Uhlupho lwaqala sivakatshelwe ngumamazala yena owasola ukuthi usisi osincedisayo endlini kaphathi abantwana ngokufanayo watshinga wathi kaxotshwe, ngavuma kodwa umkami wala wathi kakhuzwe. Ngemva kwalokho kwaqala inkulumo ezithi mina yimi engimthumayo, ngazithulela. Kusikhathi esifitshane esedluleyo, okuyikho okungizwisa ubuhlungu ubaba ubesekhaya wezwa esebuzwa ngomunye oyisihlobo ukuthi kanti why mina ngingathandi umntanakhe. Kwathiwa amapikitsha asendlini ngawomntanami kuphela kanti lawomntanakhe akhona. Kambe Khulu bayangithanda lababantu kumbe bafuna ngisuke?
Impendulo
Lababantu bafuna usuke kodwa iqiniso yikuthi awendelanga kubo balomhawu ngesinqumo elisilandelayo lomkakho ekuphatheni kwenu abantwabenu. Wena ngokwakho bayakuthanda sibili, umuntu abafuna ukumyangisa ngumkakho. Ulunge kakhulu, bafuna ukuzuza idlelo lonke engelamfazi. Khuluma lomkakho kuhle uthi kuye phakathi kwenu lobabili makube ngabantwana benu bobabili libamukele kuhle, omamazala abakhulumayo kanje lalezizihlobo ezikhwezela izikhuni zifulathele imbiza, uthando lwenu lobabili aludingi intatheli zindaba. Mbonise kuhle umkakho ukuthi lingayilandeli into le lawe ingakukhathazi kangako. Ungahlutshwa yinto enjalo lababantu yibo abaxotsha inkosikazi yakhe eyakuqala, wothi wena bacinile ngaye, wena awukwenziwa lokhu njalo awukulandeli futhi awulafolomani ngabantwabakho. Gcina umuzi wakho mama.
Umkami uyangitshaya
Ngithemba uqine saka Khulu. Sengilenyanga ezingu-18 ngendile njalo ngilomntwana. Umkami laye ulowakhe umntwana lomunye umama. Khulu ngiphila impilo ebuhlungu kakhulu angisazi ukuthi ngenzeni sengathi ngathathwa yinyamazana ngokwayo. Lokhu ngikubone sesihlala sonke. Umkami katshayi uyabulala ngiyake ngiqede amalanga amathathu kusiya kuviki ngivuvukile. Khulu ngingavele ngiphambanise ngiyabulawa, kukanti kwezinye izikhathi lanxa ngingonanga lutho ngiyatshaywa. Yena kaphambanisi njalo kabongi ngingaze ngenze okuhle. Okunye okungizwisa ubuhlungu yikuthi kwesinye isikhathi ngithethiswa phambi komntanakhe sengize ngingasamthandi lomntwana lo. Lokuhlangana emacansini akukho sihlangana kanye ngenyanga mhla efuna yena. Ngenzeni Khulu ngidabukile enhliziyweni.
Impendulo
Indaba oyikhulumayo iyangivavula amaphaphu ngicine sekungathi ngingumntwana wenyamazana abantu bengekho. Ububi bakhona abantu abanje kahle ngikuchazele kabazi kumbe kabalanzalo uvele lo umntwana athi ngowakhe wamzalelwa. Yikho umfazi wakuqala wabaleka ngoba esesaba ukuthi uzabeletha abantwana bezixukwini ngenxa yendoda engazaliyo. Njalo isihluku samadoda anje yikuthi ayaphangisa ukubhadala amalobolo evala uhlupho lobunyumba bawo. Yikho wena engikutshela khona. Ungaqali ukuzala usemzini wakhe. Uzakutshaya akubulale ehluleke ukuthi akutshele ukuthi umntwana lo umfebile ngoba yena engazali. Akungifanelanga ukukhuluma amazwi anje njalo akungilingananga kungathi ngithethisa umhlaba kanti ngikhulula wena emanyaleni omhlaba. Sigoqwa sisemanzi ntombazana. Ngakho ungatshoni uthonisa lumuntu ngoba ezakubulala. Bhala incwadi uthi kutshiywa kwakhiwe kodwa ekufeni akula sakhiwo. Ufuna ngingene kusithembu.
