uMthunywa
Kuzilwa okungakanani ungaswela
UMBUZO
KHULU: Ngicela ukwazi ukuthi ngemva kokuswela kumele ngihlale isikhathi esinganani ngingahlangananga lomkami ngoba sekulenyanga kwenzakele njalo lomkami useqalisile ukungiqhweba.
Impendulo
Akumcele ukuthi kame inyanga ezimbili. Lawe ubelomuthi owunathayo ohlambulula isibeletho sakho lemizwa yakho. Nxa ungawuzuzanga umuthi wesintu hamba ekilinika ubabikele ukuthi ufuna ukuhlambulula isibeletho noma uhlolwe ukuthi kuyini okwachitha umthwalo lowo.
Umkami kasafuni omunye umntwana
Umbuzo
Ngihlala lonkosikazi, silengane ezimbili ezingamantombazana. Mina ngifuna ongumfana uthi yena kasafuni omunye umntwana, lokho sokwenze ngayamithisa phandle. Ngingathola kungumfana ngiyathatha isithembo.
Ngifuna isibongo sami siqhubekele phambili ngazalwa ngaba ngedwa ngakithi. Ngimtshele njani ngesithembo?
Impendulo
Phumela egcekeni sixoxe. Ufuna ukuthatha isithembo na kumbe vele usulaso? Uyamtshela kanje umngane wakho.
Ungamkhahlamezi umcele umbikele ukuthi uyacela kakhulu lokuhlonipha okukhulu ukuthi makalale ngenxeba lenhliziyo yakhe njalo awusoli ngitsho, konke kukhona kuye. Isizungu sokuba lomnawakhe yile into yokuthi ale ukuzala. Umtshele ukuthi usenze wenza wena wadinga inzalo ngaphandle komuzi. Umphephise kakhulu umtshele ukuthi yena ungowakho nini lanini kodwa ucelela umnawakhe osezithwele inkonzo. Ungathumeli muntu, khuluma laye mangqamu. Uthi wena kambe leligazi ngililahle na? Wengezelele ngamanye amazwi ukwazi ukuthi ukutshaya lokukhahlameza omunye wakho akuwakhi umuzi.
Ngiyageleza amanzi embaleni
Umbuzo
Khulu uhlupho lwami lunje, ngibe le-miscarriage ngoDecember sengilenyanga ezine ngizithwele. Khathesi sengigeleza amanzi embaleni now and again njalo kuyabe kungayisiwo mchamo. Angazi Khulu kumbe yikugezwa kwesibeletho engakwenziwayo okubangela lokhu. Ekilinika sengizamile ukudinga uncedo kodwa akutshintshi.
Impendulo
Mzukulu indaba elapho isiqalelo sayo nansi. Isiko lomdabu wesintwana lithi thatha inyanga eziyisithupha noma umnyaka ungangenanga emacansini lesilisa ngoba okwenza waswela yibuthakathaka besibeletho sakho. Kufanele ngemva kwalesisehlakalo sokuswela unathe izihlahla ezingumuthi obutha isibeletho, womise imizwa ibe sendaweni ngoba khona ukuswela lokhu kudonsa imizwa lemithambo kuyihlukuluze ngoba kuyabe kungavumelananga umzimba ukuthi inkonyane iphume ngoba iphuma isivuthiwe isikhulile hatshi ngodlakela.
Yikho kuthiwa yikuswela. Amanzi la agelezayo yingozi eyisibonelo sokuthi funa uswele njalo. Zama ukukhuluma labantu ucela umuthi ongayisiwo wokunatha owokuvunula amanzi la phele. Akuvamanga ukuthi uwaqede ngomuthi wokunatha ngoba umuthi lo uphinde ugeleze. Umuthi kumele ubophe ngokuvunula. Ngomusa ungakafiki ebantwini zama intolwane, umgugudu, umdlawuzo konke lokhu kuyamunya umgelezo lo. Imvamo yalesisenzo sokuhlangana lesilisa umanzi siyayibulala indoda ngoba igazi lomopho wokuswela liyabe lingakanqumi. Ngezinye indlela utsho ukuthi usondele emacansini ngemva kwenyanga eyodwa uswele. Womisa lawo amanzi achincayo angathontela esiliseni siyafa. Uyaphila yini owangakwakho yena lo okumithisileyo?
Kaphangise anathe umhlambululagazi wona ozakhipha ingcekeza yalawamanzi.
Ngiyaphangisa ukukhipha ubudoda
Umbuzo
Khulu linjani, ngilijaha elileminyaka engu-26. Uhlupho nantu, nxa ngingahlangana lentombi ngiyaphangisa ukukhipha ubudoda bami lesitho sami sihle silale singasavuki. Nceda Khulu.
Impendulo
Ngiyaphila mzukulu. Ulovalo. Uyayazi yini i-romance. Umngane wakho lo akabaleki zifundise ukusoma laye, ukudlala laye ufike endimeni enzima ethi uphumputhe isilibaziso sakhe. Ungamjahi ngumuntu wakho lowo.
Ungaze waqala ukungena ezingutsheni umquthela. Umlindele sengathi uzadlula ku-intersection. Ngalindlela uvalo lolo olalo luzanyundeka ubesesimeni sokumlanda ngeqiniso. Kusobala ukuthi kufanele ube lesaruwe.
Ungakwejisa laye lizikhulumela nje wenze kube lomchitho wokuthi uzikhulule esaruweni. Ngaleyondlela beselingena likwejisa kuzavuka imizwa yamaqiniso.
