uMthunywa
Usangithanda yini engitshaya kangaka?
LINJANI Khulu? Ngileminyaka yokuzalwa engu-27 njalo ngilomntwana oyedwa lomkami. Umkami khulu sesileminyaka engu-8 sisonke, kodwa uhlupho yikuthi uthanda omama. Olunye uhlupho Khulu yikuthi uhlala njalonje engithethisa ngamagama abuhlungu kakhulu okungenza ngicine ngisiyabikela abadala bamkhuze kodwa aphinde akwenze futhi. Khulu kuyangikhathaza futhi ukuthi umkami kazili ngitsho ukungitshaya, ngikhuluma nje ngilenxeba elesabekayo phezu kwelihlo. Ngenzeni Khulu ngoba kangisathembi ngitsho ukuthi uyangithanda?
Impendulo
Isintu sikubeka kahle kakhulu ukuthi, induku kayakhi muzi mntanami, abathandanayo kabahlukuluzani, njalo bayabekezelelana. Lesisenzo somkakho sibi kakhulu njalo silihlazo. Umendo awuthunyelwa gudwane sibili, nga liyathumeka lalizakuba yinhloli yakho njalo litsho ukuba lapho oyakhona uyazokhela amalahle ekhanda, lapho ozakhasa phezu kwamalahle ombondo abomvu gebhu. Umendo kufanele kube lizulu lakho lemhlabeni, umthombo ohlala umpompoza intokozo hatshi ukuba yisibaya sohlupho. Ngempela uthando selupholile, luyaqanda emzini wakho. Bikela abosendo lwakini lihlale phansi ubabonise zonke lezi izinto njalo bakuncedise ukuba ungenzani.
Ngifulathele umendo na?
Khulu sengileminyaka emihlanu ngendile njalo ngilomntwana oleminyaka emibili, khathesi ngizithwele. Mina Khulu ngihlala ekhaya umkami uyasebenza edolobheni kodwa khathesi ngikubhalela nje ngithukuthele kakhulu ngifike lamhlanje ekuseni ngivela ekhaya umkami bengingamtshelanga ngamfonela ngisithi angivulele emnyango wathi kakho ngasengibulala ifasitela ngamangala ngibona umuntu ephakathi endlini lentombi. Khulu khathesi nginje ngidabukile. Ngenzeni, ngitshiye umendo yini?
Impendulo
Kuqakathekile ukuba emva kwenkemenkeme engaka lihlale phansi lomkakho, likhulume kabanzi ngaloludaba. Kuyadingeka ukuba umbikele indlela ozwa ngayo njalo laye akubekele sobala ukuba kwahamba njani aze atholakale esemacansini nje. Okunye mzukulu, kulesitsho sabadala esithi “indoda ifana lenja” kungakho-ke lawe kwazi lokhu. Ungafulatheli umuzi wakho ngesehlakalo esisodwa kuphela. Okusalayo yikuba unanzelele ukuziphatha kwakhe emuva kwalesi sehlakalo. Ngesinye isikhathi uyazisola, kungakho mnike ithuba lokuba axolise, lawe uvume ozakwenelisa ukuphila lakho.
Ikhitshwa kuvedina imali yomkami
Khulu ngicela ungeluleke. Umkami kangiphi imali ngitsho leyemibhida ungiqhubela eyenelayo ukuze ngingasali lentshintshi. Angisakwazi ukuthi ngithini Khulu ngoba lanxa ngifuna imali yokuthenga okunye kumele ngiqale ngimbikele sonke isikhathi athethe khona ezangipha. Kuqondile yini lokhu okwenziwa ngumkami ngoba kafuni lokuthi ngidinge umsebenzi?
Impendulo
Imvelo ikubeka sobala ukuba umama yisona sitsha sokudlela phela endlini. Ngumuntu ophakulula izimbiza emuva kokupheka ubaba nxa evela zingela. Lokhu kufanele ukuba yisifundo kubo bonke obaba ukuba umuntu kazingeli aqede aziphekele inyama oyijimbileyo, kufanele anike abapheki ukuze laye ahlale phansi aphumule. Kungakho-ke lendoda uqobo kayihambi iyesebenza imali iqede iyibophele esokisini kodwa kufanele inike umama. Xoxisanani ngalokhu lomkakho, umbonise ukuba lawe ulendingo zakho njengowesifazana oyabe ufuna ukuzilungisa ngemali. Nxa kusehlula libabili kuhle ukuba udinge isihlobo sakhe esiseduze, ukuze sibe ngumlamulankuzi.
