uMthunywa
Yintatheli kaMthunywa
KUSIGA esihlasimulisa umzimba kubikwa kulendoda engusobhuku eSomgolo eLupane etholakale ilohalabezi lwenyoka ebilezitho zangasese ezimbili, esomfazi lesendoda abeyisebenzisa ukumnika amandla lokumgcina esikhundleni.
Isiga lesi senzakale ekuqaleni kwayonale inyanga lapho uMnumzana Albeit Moyo atholakale elenyoka abelala phezu kwayo ngenhloso yokuziqinisa lokugcina isikhundla sakhe njengosobhuku.
Inyoka le kubikwa ibihlukuluza abantwana bakasobhuku lo abangamankazana emacansini kukanti kubikwa ibikhuluma, uMthunywa ukuzwile lokhu.
Ekhuluma lentatheli omunye umfakazi owale ukuqanjwa ngebizo ngenxa yokwesaba, obekhona ngesikhathi inyoka le ikhitshwa ngomunye umama wesonto yeZiyoni uveze ukuba lokhe bekhakhamele ngomhambaphansi lo.
“Silapha asilankani ngesiga sikasobhuku lo lenyoka yakhe, wawuthi uyibona uzwe umzimba umila izindlu zamakhaza usethuswa yikuthi yinyoka ephilayo sibili.
Umuntu angalala phezu kwayo alale behle sibili?
“UMoyo wazihambela yedwa ukuyadinga abantu beZiyoni laba, akulamuntu owambamba ngamandla engazi ukuthi umama lo uzamenzela intshaka kumbe ubethi bazamceza manje wakha phansi sebemembule ebantwini.
Baveza obala ukuthi ulenyoka yakhe emsebenzelayo okuthiwa ngu“Giant”.
Abasiki bebunda kuthiwa bamuzwe esiyakhona ethi umfazi angenzani, umncane kakhulu ethi uyasoma kanti kabuzanga elangeni,” kubika umfakazi lo.
Uqhubekele phambili eveza ukuba umhambaphansi lo wakhutshwa uzulu wonke ekhona ekhangele.
“Isikhitshwa yayitshinga isala yagijima yaqonda esihlahleni bayilandela yathi isikhwele esihlahleni kwathiwa umnikazi kayikhulumise yehle wakhuluma layo ngolimi esingaluzwayo yabanjiswana isiyafakwa phakathi kwe-drum, ngikhuluma nje lokhe iphila iphakathi kwe-drum, isilamaviki amabili ikhonapho.
Ngeviki ephelileyo kuthiwa ikhulumile yathi isilambile abayinikanga lutho.
“Kuyonale iviki bake bayivula bayikhangela bathola ilokhe iphila kusalindwe ukuba kuyekhitshwa ondofa abangu-8 kwesinye isakhamuzi kuhle kutshiswe kanye konke.
Silapha asilankani, uthi pho besibuswa nguye usobhuku kumbe besibuswa yinyoka leyi, asisakwazi okuyikho, ubemenzela izimanga umphurofethi lo ongumama.
Imizamo yokukhulumisana lalowo ocatshangelwa ukuba ngumnikazi wenyoka uMnumzana Albeit Moyo ongumkhulu wabosobhuku kuleyo ndawo yehlule ngoba inombolo zikamakhalekhukhwini wakhe zingatholakalanga.
