uMthunywa
Pumulani Mpofu
UThando Moyo ngomunye wabantwana abazithola bephakathi laphakathi kwengxabano zabazali babo. UThando uleminyaka elitshumi lasithupha ukuzinga lika Form 4.
Abazali bakhe, uLinda Ndlovu loThabani Moyo, babetshadile ngokwesiko lesintu behlala ndawonye kodwa kwenzeka ukuba baxabane uLinda wathwala konke okwakhe waze wathwala lamaphepha omntwana esibhedlela lesithupha somkakhe ethi uyamkhawulisa.
Ngesikhathi esuka uThando waleminyaka eyisikhombisa wamthwala wamusa kugogo wakhe ozala uyise wafika wamkhombela wathi ngena. Ugogo ngokwazi umzukulu wakhe wamthatha wamgcina kasazange ayekhuluma emapholiseni ukuthi umntwana ulahlelwe kuye.
UThabani wasuka waya eGoli ethi uyazama impilo wahamba wajika itshoba kazange aphenduke uThando wasala ehleli logogo wakhe. Wazama umuntu omdala ukuba akhulumisane labakoLinda ukuba bancedisane ukuthathela umntwana incwadi yokuzalwa yena uLinda wala ethi uThabani akumelanga abelentokozo ngenxa yalokhu ayemenze khona.
Lokhu kwababuhlungu kwabakoThabani ngoba bona bezwela umntwana owayengela ncwadi yokuzalwa. Kwaba lokuphoselwana kwamagama phakathi kwemuli lezi ezimbili. Umama kaThabani wazama ukuthi adinge uThabani kodwa wehluleka laye waze walahla ithawulo.
Kwathi ngemva kweminyaka ethile umzwangedwa wabafinyelela abakoLinda bayakhulumisana labakoMoyo ukuba selokhu abantwana babo sebahamba bajika itshoba bengenzanjani ukuthi umntwana engahlupheki ngoba iminyaka iyahamba njalo kumele abhale imihloliso.
Bazama ukulonda umzila lapho umama womntwana ayezwakalela khona kodwa abazange bamthola babethi nxa besizwa bezwa kuthwa uyaphila kodwa kungekho nto ekhona. Bacina bekhalala ukumdinga. Kwathi ekuzameni kwabo amaqhinga okuthathela umntwana incwadi yokuzalwa umama kaThabani wasehlangana labeTrinity Project ababanika isixwayiso sokuba bona njengogogo bomntwana bangamthathisa kodwa nxa belamaphepha abazali bomntwana.
Njengoba ogogo laba babefuna ukwenzela umntwana badinga okwakukhona okwabazali bomntwana okwakungabancedisa ukuthi bathole amaphepha abo. Ngosizo lweTrinity Project benelisa ukuba baye koMsitheli bayethatha incwadi zabantwana babo ezokuzalwa ezaziyizo ezazizabasiza ukuthi bathathe incwadi yomntwana yokuzalwa.
I-Trinity yabasiza ukuba baye eMpilo Hospital okulapho abathola i-birth record basebesiya eLuveve Clinic okulapho umntwana ayehlatshwa bayathatha khona i-confirmation yokuba umntwana wahlatshwa wonke amajekiseni esamncane, benelisa ogogo ukuthola incwadi ezeneleyo basebebhalelwa incwadi baya koMsitheli bayathatha incwadi yomntwana yokuzalwa, baphumelela ogogo bayithatha lincwadi lomntwana wenelisa ukuthi abhalise imihloliso yakhe.
Kulilungelo laye wonke umuntu ukuthi abe lencwadi yokuzalwa ukuze enelise ukuthi azazi ukuba ungubani njalo enelise ukuhlela impilo yakhe.
Kasihlanganeni njalo kuviki elizayo.
Umlobi utholakala kukheli ethi [email protected] loba kunombolo ezithi 0773195055
