uMthunywa
Kwathi mhla kutshada uPhakamile izihlobo labangane bajabula, bathaba babamanzi te, ngoba besazi mhlophe langempela ukuthi wayezawuphakamisa umuzi wakoMpangazitha, ngoba kukhangelelwe ukuthi azalele uninazala owayesewabhujelwa ngamadodana amathathu lamantombazana amane, esesele lababili.
Kwadliwa kosiwa kwajatshulwa, zahamba inzinsuku zaphenduka izinyanga, izinyanga zona zazala iminyaka, waqala esavika ngokuthi usekolitshini, yikho engajahanga ukuba labantwana, lomkakhe wayekuzwisisa ngoba engafuni ukuphazamisa omunye wakhe ezifundweni, phela imfundo yiyo isiqokoqela.
Ngikhumbula ubaba ongasekho emhlabeni wayehleli esixwaya ukuthi akula nhlamba ongathuka ngayo umntwana edlula ukungamusi esikolweni. Wathi eseqedile izifundo zakhe zekolitshini umkakhe, njengomuntu owayeseseloyisemkhulu, wayephunga inkovu ayeziphekelwa ngukhulu wakhe ethi ngezokuqinisa iqolo.
Wazama konke kwehlula, wanatha inhlobonhlobo yemihluzi ihlanganiswe lemigcozo ethile kodwa akwasiza lutho. Laye uPhakamile kwaqala ukumkhathaza ukuthi kungani engazithwali, phela umkakhe wake wona umntaka-makhelwane wakhe besafunda, lokho yikho okwakusenza umdeni ubelesiqiniseko sokuthi inkinga ikuPhakamile.
Njengoba ubazi abantu baqala ukukhuluma, onozindaba baqala ukuthi kade wazikhupha izisu, yena engazange, babekhuluma angani ngumuntu abamaziyo njalo abakhula laye. Okunye okwakukhulunywa kwakucina kufikile endlebeni zakhe kumlimaza emoyeni.
Ngelinye ilanga wathi ebuza umkakhe ukuthi kungani ephuzile ukuza ngekhaya wamphendula wathi kusizani ukuthi aphangise ukuzolala njengoba inkelo zakhe zingelamavuntshe, wakhala ubusuku bonke esizwa impendulo ayengayilindele kumyeni wakhe. Wahle wayifunda ivaliwe ukuthi umendo wakhe usuxega, waqala ukungena amasonto emimoya wona okulabaphurofethi, wathi mhla efikayo, ekhuluma lodubo lwakhe kwathiwa kulento engaphansi kwenkaba yakhe okumele ikhitshwe yiwo echitha izisu zakhe nxa zithi ziyabumba.
Kwathiwa kuzamele abuye lomsila wenhlanzi leqanda eselifukamelwe okwamaviki amabili ayekhulekiswa phezu kweqaqa njalo angezi lomkakhe.
Amaqanda
Laye ngenxa yokuthi wayefuna ingane wakholwa nanku phela ababona emakhazeni okungabonwa ngelihlo babethi uninazala kadabuli ngubo.
Wathi etshela umkakhe laye wavumela phezulu ngoba eyithanda intokazi yakhe.
Wathi efika sokunqunda amehlo wahamba lomphurofetthi phezu koqaqa kwathiwa kakhumule izigqoko asale enqunu, waqala wenqaba,
watshelwa ukuthi umoya awuphikiswa ngoba yena ukhuluma okutshiwo “nguMdali” etsho ewahutshuza aluhlaza tshoko amanga .
Waqala ukumbambabamba wathi izitho zabo zangasese kumele zithintane yikho ukuthi leyonto ayeyibonisiwe iphume. Lwamtshaya ngamandla uvalo, umphurofethi wamdlwengula, wesaba lokuthi afike atshele umkakhe, isimanga kuthe kungensuku ngaki weqa ukungena esikhathini umkakhe wajabula wathaba ngoba laye wayesekholelwa ukuthi imithandazo yomphurofethi iyasebenza njalo ikhiphile leyonto ebivala inzalo yomkakhe.
Kwakuthi kungakhulunywa ngomphurofethi lo uPhakamile azonde anuke okobulongo bechalaha obunethwe yimbolisamahlanga. Wazalwa umntwana labe seliwuchithile umuthi inkonyane, waziphumela umntwana efana loyise umphurofethi. Wadana kakhulu umkakhe kwakhona ekhuluma iqiniso ukuthi kwenzakalani, wasebotshwa umphurofethi ebotshelwa ukudlwengula, umendo kwahle kwaba yikuchitheka kwawo.
Ayixabene.
