uMthunywa
KULENDODA eleminyaka engu-37 ehlala eChidhume ngaphansi kwenduna uChivi eMavingo evuke ubhova yahamba ihlahlela abantu okubangele ukuthi kufe abathathu kwalimala oyedwa andubana itshise umuzi.
Kubikwa ngoLwesibili ngezikhathi zemini enkulu uMoses Hungwe wayejikijela amatshe emangcwabeni aseduzane langakibo wasekhuzwa ngumnewabo uTerrence Shiri okwabangela ukuthi asuke ayengena emkulwini.
UTerrence wazama ukumbopha kodwa lokhu kwahle kwamcunula wadobha ihloka waqala ukugijimisa umnewabo. Kubikwa umnewabo wabaleka wayangena komakhelwane wabo lapho afica abantwana abathathu wabathatha wangena labo phakathi kwensimu wabafihla, andubana agijime eqonde entabeni.
Kubikwa umetheswacala walandela ensimini lapha afika wahlahlela abantwana laba ngehloka bafa.
Isikhulumi samapholisa eMasvingo uKudakwashe Dewa uthe uMoses Hungwe efika ensimini wahlahlela uPanashe Masvimbo (8) ngehloka esihlathini wafela lapho, kuthi uKunashe Chikwenya (5) wamhlahlela esiphaqeni laye wafa. Omncane oleminyaka emithathu wamtshaya laye esihlathini wafa.
Ihloka
Kubikwa umakhelwane walapho umnewabo kametheswacala ayebalekele waqonda khona, uAmos Chimbetete (79) esizwa umkhosi wabantwana walandela emasimini wafica abantwana sebefile khonokho uMoses wamhlasela laye ngokumhlahlela ngehloka ekhanda.
Kubikwa omunye umakhelwane esizwa uChimbetete ehlaba umkhosi edinga uncedo laye waqonda lapho okwakuvelela khona umsindo wenelisa ukumthathela ihloka umetheswacala wasuka lapho esegane unwabu waqonda ngakibo lapho afika watshisa izindlu ezimbili.
Izidumbu zasiwa eChivi District Hospital Mortuary lapho ezilinde khona ukuhlolwa. Isikhulumi samapholisa siphethe ngokuxwayisa bonke abahlala labantu abangaphilanga kuhle engqondweni ukuthi babahambise esibhedlela ukuze bayekwelatshwa. Uthe kumele baqaphele babone ukuthi bayanatha amaphilisi ngendlela eqondileyo.
