uMthunywa
Thokozile Mbedzi
ZILOKHU ziphethe izibindi ngezandla izakhamizi zesigabeni seNyandeni, eGwanda kulandela ukuzwa ngenye indoda etshaye yabulala umkayo yamngcwaba ensimini kubangwa imali.
Kubikwa isehlakalo lesi sivele kuviki ephelileyo ngeSonto mhlaka 12 Mbimbitho.
Kuvele ukuba mhlaka 28 Nhlolanja umetheswacala uFebwell Nyandeni Matema (40) wasuka lomkakhe uNomathemba Msipha (27) bayathengisa izilimo ababezivune emasimini abo.
Kubikwa bathe sebephenduka sebelemali baqala ukuxoxisana ngokuthi bazasebenzisa njani imali leyo okuyikho okwabangela ukungazwanani phakathi kwabo uMatema wacina etshaya umkakhe waze wafa.
Omunye umakhelwane okhulume loMthunywa uMnumzana Stephen Nkosi uthe kwenzakale isiga esihlasimulisa umzimba esigabeni sabo.
“Kukhanya uMatema wavumelana lomkakhe ukuyathengisa izilimo zabo eVumba Mine.
“Uhlupho lwaqala sebekhuluma ngendlela abazasebenzisa ngayo imali abayitholileyo basebesiba lokungazwisisani ngokuthi bazayisebenzisa njani imali.
“UMatema wathukuthela waqala ukutshaya umkakhe ngogodo umzimba wonke langemva kwendlebe okwabangela ukuthi awele phansi wasenanzelela ukuthi usedlule emhlabeni,” kulandisa uMnu Nkosi.
Uqhubekele phambili esithi uMatema wathwala isidumbu somkakhe wahamba laso ensimini yakhe wafika wagebha igodi wamngcwaba. Kuvele njalo ukuthi uMatema ubethi nxa ebuzwa ngomkakhe athi uvakatshile yena esazi ukuthi wambulala wamngcwaba.
“UMatema ngoMgqibelo watshela omunye umakhelwane ukuthi watshaya unkosikazi wakhe wafa ngokwethuka wayamngcwaba ensimini. Umakhelwane lo esizwa lokhu wahamba wayabikela amapholisa abuya azogebha ensimini lakanye bahlangana lenkemenkeme le yendaba,” kuchasisa uMnu Nkosi.
Isikhulumi samapholisa esabelweni seMatabeleland South uInspector Loveness Mangena uthe udaba lolu solufikile ehofisini, bachwayisisa ngodaba lwendoda eyabulala yangcwaba umkayo ensimini.
“Samukele umbiko wendoda etshaye umkayo kubangwa imali yezilimo wafa andubana iyemngcwaba ensimini,” kuchaza uInsp Mangena.
