uMthunywa
Khanyile Ndebele
ABABONA ngezokulima sebekhuthaze abalimi ukuthi balime izilimo zentanga ezifana lamakhomane ngesikhathi sezulu ukuze bakhulise isivuno sabo njalo lezimuli zithole ukudla.
Omunye umlimisi, uMnumzana Jilly Ncube osebenza kunkampani yeFarm and City uthe nxa umlimi esekhethe ukulima amakhomane kumele abone ukuthi lokhu ukwenza ngendlela efaneleyo ukuze azitholele imali.
“Igodi lapho okuphoselwa khona intanga zamakhomane kumele libe litshona okwe-3cm kusiya ku 5cm.
Intanga zona emfolweni kumele zehlukane nge-30cm kuthi emfolweni munye ngamunye kumele zitshiyelane umkhandlo we-75cm kusiya kumitha eyodwa,” kutsho uMnu Ncube.
Uthe okunye okubalulekileyo yikuthi umlimi alungise umhlabathi wakhe awuhlanganise lomquba ovuthiweyo ongaba leminyaka emibili osungamagade.
“Kugodi linye ngalinye umlimi uyabe ekhangelelwe ukuthi aphosele intanga zibe mbili egodini linye ngalinye.
“Nxa esenabile amakhomane akho kumele ufake izigodo kunye lentambo ukuze akhule esiya phezulu.
Lokhu kuyasiza njalo ukuthi intanga zakho zihlale inyanga ezine kusiya kwezinhlanu umlimi elokhu ewavuna,” kutsho uMnu Ncube.
Eyinye indlela umlimi angathelela ngayo nxa izulu lingananga lenela yiDrip system.
Uthe amakhomane awandisanga ukuhlaselwa yizibungu kodwa ukuwavikela umlimi kufanele afafaze umuthi obizwa ngokuthi yi-Diathote exotsha izibungu. ezingathanda ukusondela esilinyweni lesi.
