uMthunywa
ISILINGANISO sabantu abalegcikwane le-Covid-19 sesikhuphuke safika ku-8 kweleZimbabwe.
Kubikwa kulabantu abangu-233 abahlolwayo batholakala bengelalo leligcikwane kukanti kuloyedwa osewatshiya umhlaba kubangelwa ligcikwane leli.
Otholakale elegcikwane leli ngoMvulo kuyonale iviki ngowesilisa oleminyaka engu-21 oweMashonaland East ongelambali yokuvakatshela amanye amazwe kodwa ulobudlelwano lowesithathu owatholakala elegcikwane leCovid-19.
Isigulane sesithathu ngowesilisa oleminyaka engu-51 njalo engowe-Mashonaland East owayethekelele eDubai wasetholakala elegcikwane leli ngoLwesibili ngeviki ephelileyo.
Abathathu abangazange bavakatshe ababalobudlelwano lesigulane sesithathu labo batholakale belalo igcikwane leli.
Isigulane sakuqala ukutholakala silegcikwane le-Covid-19 yindoda yeFolosi eyatholakala ilegcikwane leli mhlaka 20 Mbimbitho njalo kubikwa lindoda yayike yavakatshela ilizwe leUnited Kingdom kukanti isigulane sesibili, usaziwayo uZororo Makamba, watholakala elegcikwane leli mhlaka 21 Mbimbitho kodwa wedlula emhlabeni ngoMvulo ngeviki ephelileyo. Umuyi kubikwa wayeke wethekelela e-United States of America.
Isigulane sesine ngowesifazane owayevakatshele eMelika watholakala elegcikwane ngoLwesine ngeviki ephelileyo. Isifo lesi esihlasele umhlaba wonke jikelele sesahlasela abantu abedlula abangu-700 000 sabulala abedlula abangu- 30 000.
Yiloba isifo lesi saqala eChina, ilizwe leChina selenelisa ukusilawula kodwa sithwalise amazwe e-Europe le-United States of America amagabha avuzayo. UHulumende sewethula ukuthi abantu bahlale ezindlini okwensuku ezingu-21 ukuze kwehliswe ukumemetheka kwalesi sifo.
Amanye amazwe lawo sewathatha isinqumo esifanayo nanko phela kubikwa isifo lesi simemetheka kakhulukazi lapho okubuthene khona abantu abanengi.
Kusitatimende, unobhala omkhulu kugatsha olubona ngezempilakahle kanye lokondliwa kuhle kwabantwana uDokotela Agnes Mahomva uthe kusiyafika oLwesithathu abantu asebahlolwa umkhuhlane lo bangu 241 elizweni lonke jikelele. Uthe abaseleyo abayisikhombisa basesimeni esimnene.
UDokotela Mahomva uthe uHulumende uhlezi eqaphele ukwenqabela ukumemetheka komkhuhlane lo wakhuthaza abantu ukuthi baziphathe kuhle njalo bahlale belandela indlela ezicetshiswayo ezokuhlanzeka.
“Kumele sigeze izandla ngamanzi alesepa ngaso sonke isikhathi kumbe sisebenzise umuthi obulala amagcikwane ole-alcohol, ukuvala amakhala lomlomo nge-tissue nxa sikhwehlela lakho kumqoka kukanti ukukhwehlelela kungaphakathi yendololwane lakho kuyaphathisa ukuthi singamemethekisi lumkhuhlane. “Abantu kumele bangasondelelani labantu abagulayo, abangabe bethimula kumbe bekhwehlela njalo kumqoka ukuthi bangathinti ubuso ikakhulu umlomo, amakhala lamehlo,” kutsho uDokotela Mahomva.
