uMthunywa
Thokozile Mbedzi
KULEMULI yesigabeni seMapfumo, eZaka eMasvingo okubikwa ihlaselwe yimpisi yalimaza amalunga amathathu emuli le okubangele ukuthi alahlekelwe yizitho zomzimba ezehlukeneyo.
Imuli yakoMarovhe kubikwa ihlaselwe yimpisi le, ngoMvulo ebusuku ngehola lika 10.
Kubikwa impisi le iqale yahlasela imbuzi esibayeni uMnumuzana Robert Marovhe oleminyaka engu-37 wasesiyakhangela ukuba kuyini okwenzakala esibayeni wathola ukuba yimpisi wavala isibaya wabuyela endlini yakhe yokulala.
impisi
Kubikwa uMnu Murovhe uthe ezama ukuvula umnyango, impisi yahle yamhlasela wahlaba umkhosi unkosikazi wakhe, uMunoja Muchanyara weqa ethi ayobona ukuthi kwenzakalani laye wahlaselwa ngokufanayo.
Lokhu kwenza ukhulu, uRwatiwenga Marovhe oleminyaka engu-75 yokuzalwa wavuka laye esiyabona laye ngokufanayo wahlaselwa yimpisi le.
Ekhuluma lentatheli kaMthunywa uNkosazana Sonia Moyo uthe impisi le ithumbe imuli yonke emzini wayo nanko ibithi ingavele ibone omunye imhlasele.
URobert waqunywa iminwe eyaphakathi yomine, kanye lesihlathi.
Kukanti uMunoja Muchanyara wagxavunwa izandla zombili, isihlathi kunye lamakhala okwabangela ukuthi aqunywe izandla zombili.
UKhulu uRobert yena walunywa umlenze kunye lesiswini.
Umkhosi wemuli le wenza omakhelwane baqoqana babuya sebebanengi okwenza impisi le yabaleka.
“Silapha silokhe sizibuza ukuthi impisi le bekutheni ngoba sisazi ukuthi ihlupha nje esibayeni legangeni hatshi ukuthi ize ingene endlini.
Silemibuzo engadingi impendulo ngokwehlele imuli yakoMarovhe,” kulandisa uNkszn Moyo.
Isikhulumi samapholisa esabelweni seMasvingo ulnspector Kudakwashe Dhewa ebuzwa ngodaba lolu uthe solufikile ewofisini yabo.
“Samukele udaba lwemuli ehlaselwe yimpisi. Amalunga emuli le asele elamanxeba atshiyeneyo,” kuphetha ulnsp Dhewa.
