uMthunywa
Ethel Ncube
IZAKHAMIZI zeNtalale eGwanda sezikhale zaze zoma ngokudlelwa izifuyo zazo zimpisi osekubangele ukuthi inengi lazo izibaya zisale zitshaya ibhungane.
Kubikwa ngeviki kudliwa izifuyo ezedlula amatshumi amabili endaweni le osokubangele ukuthi inengi lezakhamizi zikhalale ukufuya ikakhulu obabhemi lembuzi.
Kuzwakale ukuthi impisi lezi zizithaphuzela imbuzi kanye lamathole.
Esinye isakhamuzi esikhulume loMthunywa, uMnumzana Thembani Moyo uveze ukuthi impisi lezi sezibadlisa imbuya ngoluthi njalo kazisesabi ngitsho abantu ngoba seziphambana labo endleleni.
“Kuviki ephelileyo ngifice sekusele inhloko kuphela esibayeni sami sembuzi impisi sezizitshayele esikhewini.
“Kasisakwazi ukuthi sithini ngazo ngoba labantu kazisabesabi ngitsho zimane nje ziphambane lawe zizingela izifuyo zethu,” kuchaza uMnu Moyo.
UMnu Moyo uqhubekele phambili wathi inengi labo beliphila ngokuthengisa izifuyo ukuze abantwana baye esikolo kodwa khathesi sekunzima ngoba inengi labo kalisela mbuzi.
“Mina minyaka yonke bengisazi ukuthi ngingathengisa imbuzi eyodwa kumbe ezimbili ngiyenelisa ukuthi ngibhadalele abantwabami imali yesikolo kodwa sikhuluma nje abantwabami lokhe bengakabhadali ngoba kangisela ngitsho leyodwa yokukhipha umuthi,” kulandisa uMnu Moyo.
Esinye isakhamuzi uNkosikazi Mary Bhawa uthe yena sewafundisa izinja zakhe ukwelusa ukuze avikele imbuzi zakhe ekudliweni zinyamazana lezi.
“Izinja yizo esezingelusela imbuzi zami ngoba ngasengidlelwe ezine.
“Khathesi ngingaze ngizivalele izinja zilala zilindile ukuze nxa ingathutsha impisi zihle ziyihlasele,” kutsho uNkkz Bhawa.
Iphephandaba likazulu lizwe njalo ukuba ezinye izakhamizi sezithengisa izifuyo zazo ukuze zingapheli basale bengelalutho njengoba lemasimini bengazange bavune lutho.
UMnumzana Lerato Ndlovu ubike ukuthi ukufuya sokunzima kulesi sigaba njalo kabasakwazi ukuthi bazafuyela ngaphi.
“Thina asisakwazi ukuthi senzeni ngempisi lezi, kukhanya zingumhlambi ngoba imbuzi ezidliwayo ngelanga zinengi kakhulu. Sesihlala selusile lasebusuku sisesaba ukuthi singaphelelwa yizifuyo. ngoba ungekela ukwenza njalo ekuseni uthola zingasenelanga,” kuphetha uMnu Lerato Ndlovu.
Imizamo yokukhulumisana labeParks and Wildlife yehlule.
