uMthunywa
YiNtatheli KaMthunywa
KULEMULI yakoChikukwa ehlala esigabeni seMasase ngaphansi kwenduna uMarange eBocha eMutare, okubikwa ithwele amagabha avuzayo nanko phela ihlala ibona amaqanda abhalwe amabizo abo njalo ehlatshwe ngamanalithi, njalo omunye umntwana olilunga lalimuli nxa egqoke impahla ziyaqala ukutsha zodwa zize zibe ngumlotha kodwa yena engatshi.
Kubikwa linsindabaphenduli yenzakala kumuli zakoChikukwa esigabeni lesi okubikwa zine njalo zihlangana lezimanga lezi ezigoqela ukulunywa lokuklwejwa yizinto abangaziboniyo, ukuthelwa ngenhlabathi lempuphu ebusweni, ukuthelwa ngomlotha emakhanda lokutshaywa ngamampama.
Ekhaya lapha kubonakala amaqanda abhalwe amabizo abantu abahlala lapho njalo abantwana balandelwa ngabantu abafitshane abakhuluma labo babone njalo lenjuzi nxa befika emthonjeni loba bedlula emfuleni elamanzi.
Phezu kwalokho abemuli le batshaywa ngamatshe abangaboniyo ukuthi ajikwe ngubani.
Imuli ezihlangana lohlupho lolu zigoqela ekaGasbar Chikukwa, Webster Chikukwa, Admire Chikukwa loEphraim Chikukwa.
UMnu Gasbar Chikukwa (42), uthi inkinga le yaqala eminyakeni emibili edluleyo lapho abantwana abaqala khona ukubona amaqanda emigwaqeni lasegumeni, basebeqala-ke ukujikijelwa ngamatshe.
“Amatshe ayabe ephongukujikwa egumeni laphezulu kwezindlu singaboni lokuthi avela ngaphi, sithelwa ngemphuphu ebusweni ngapha sitshaywa ngamampama, ukuncwetshwa lokulunywa.
“Silomntwana ongumfana uWebster kwezinye izikhathi uyathi ezihlalele nje impahla zakhe sizibone sezilomlilo zisitsha njalo abantwana babona okungamadoda okufitshane lenjuzi bakhulume lazo,” kutsho uGasbar.
Abantwana bemuli lezi abasahambi esikolo ngoba batshaywa ngamatshe avela emoyeni bephakathi kokufunda.
UWellington Chikukwa oleminyaka engu-20 ugcizelele ukuba impahla zakhe seziphelile ngokutshiswa ngumlilo obhebha wodwa egqokile kodwa yena engatshi.
“Sengisehluleka ukuya lapho okulabanye ngokwesaba ukuthi impahla zami zizaqala ukutsha ngisendleleni, angazi ukuthi ngingasizakala njani,” kutsho uWellington.
“Siyake sibaleke siye egangeni loba emasimini ukuyolala lokuyacatsha amatshe asilandela ndawo yonke.
“Emzini kababomdala uWebster Chikukwa amazenge aphela ngokutshaywa ngamatshe, kwezinye izikhathi bebesehliswa embhedeni balaliswe phansi endlini yabo yokulala lonkosikazi.
Khathesi sebathutha sebehlala eMutare,” kutsho uMugova Chikukwa.
“Inkinga le yaqala kuze kubhubhe ubaba wethu uElisha Chikukwa ngomnyaka ka2018.
Indlu ayehlala kiyo ivuka ivuliwe kodwa ilele ikhiyiwe.
“Ubaba kubikwa wafa ngokufakelwa itshefu ngesinye isihlobo sakhe.
Mina sengatshiya umuzi wami kungakho ngidinga usizo,” kutsho uWebster Chikukwa.
Uqhubekele phambili esithi, “Sesiphelelwe yikudla, abantwana abasayi esikolo. Sicela abomoya basincedise,” utsho njalo.
Abanye abazali batshiya abantwana bodwa besiyadinga usizo endaweni ezitshiyeneyo.
Kulabo abafuna ukusiza imuli le bangatshayela inombolo ezilandelayo ucingo, 0771 165 052, 0776 581 634, 0778 207 131, 0774 304 337 lo 0776 582 515.
