uMthunywa
Cornelius Luphahla
INHLANGANISO yeLupane Women Development Trust ikhuthaze izakhamizi zeLupane ukuthi zibambelele emisebenzini yezandla ngenhloso yokuzithuthukisa.
Lokhu kuvezwe nguMqondisi wale inhlanganiso uNkosazana Hildegard Nyathi emkhosini wokuthakazelelwa kwemali engange$100 000 ephiwe inhlanganiso le yinhlanganiso yeUnited States of America Development Foundation obuseLupane.
Ekhuluma emkhosini lo, uNkszn Nyathi ubikele uzulu ukuthi aqakathekise imisebenzi yezandla ngoba iyathuthukisa njalo iyaqinisa umzimba.
“Ngikhuthaza uzulu ukuthi aqakathekise imisebenzi yezandla ngoba iyathuthukisa. Imisebenzi le igoqela ukuthunga ngelala okuyikho esigxile kukho njengenhlanganiso, ukubaza, ukwakha kanye leminye njalo imisebenzi eletha inzuzo.
“Ngitsho ngoba inengi lamalunga enhlanganiso yethu selithuthuke ngendlela emangalisayo ngenxa yokuthunga izitsha zelala. Ngalokhu ngixwayisa uzulu ukuthi aqhubekele phambili ethunga njalo siyabamukela abafuna ukuba ngamalunga enhlanganiso yethu ngoba sifuna ithuthuke ngamandla,” kutsho uNkszn Nyathi.
UMthunywa ukhulumisane lomunye wamalunga ale inhlanganiso uNkosazana Thandeka Ndlovu wathi usethuthukile ngenxa yemisebenzi yezandla.
“Mina ngingumfelokazi njalo ngangena kule inhlanganiso ngomnyaka ka-2008. Ngemva kwalokho ngaqalisa ukuthunga izitsha ezehlukeneyo ngelala ngizithengiselwa yinhlanganiso le. Ngokunjalo okungijabulisa kakhulu yikuthi khathesi sengathenga izifuyo zami kanye lenqola ngabuya njalo ngagebhisa umgodi emzini wami.
“Ngokunjalo khathesi sengilima izilimo ezehlukeneyo ngenxa yolwazi engiluthola kule inhlanganiso. Ngalokhu lami ngikhuthaza izakhamizi zalapha ukuthi zibambelele emisebenzini yezandla ukuze zizithuthukise,” kuphetha uNkszn Ndlovu.
