uMthunywa
Cornelius Luphahla
USUPHELELWE ngamasu umdeni wakoNdlovu esigabeni seDlawa eNkayi ngokufelwa ngabantwana ngemva kokuba uhlawulise esinye isakhamuzi imbuzi.
UMthunywa uzwe ukuthi inkomo zikaMnumzana Joram Sibindi zadla amabele kaMnumzana Edward Ndlovu wasemhlawulisa imbuzi ezintathu ngemva kwalokho umdeni wakoNdlovu waqalisa ukubona imguwe ezindlini.
Kubikwa ngemva kokubonakala kwemguwe le kwahle kwaqalisa ukufa abantwana okuyikho okudale ukuthi bacabangele ukuba babulawa nguSibindi nanko phela kubikwa wathi imbuzi zakhe bazazibhadala zonke.
Kubikwa ngesiko kuyazila ukuthi umguwe ungene endlini yikho okudala ukuthi umdeni lo ucabangele ukuthi imguwe le yiyo eyaletha ukufa ekhaya. UMthunywa uxhumane loMnumzana Elliot Ndlovu olilunga lalo umdeni walandisa ngokubonakala komguwe lo kanye lokuthi waqalisa kutheni.
“NgoNhlolanja lonyaka inkomo zakoSibindi zangena emasimini kamnewethu wasesiyamangala kusobhuku, uSibindi wahlawuliswa imbuzi ezintathu. Ngemva kwalokho wabuya kimi wathi imbuzi zakhe ahlawule ngazo umnewethu sizazibhadala.
“Ngemva kwamalanga amathathu umnewethu wasibiza ethi uthole kulomguwe endlini yakhe wawubulala kodwa kakwazi ukuthi ungene njani. Sawuthatha umguwe lo sawutshisa kwathi kusasa lami ngawuthola endlini yami uphila ngawubulala sawutshisa. Kwathi kungakapheli amaviki amabili ubusubonakale kubafowethu bonke bobane kanye lakimi,” kulandisa uMnu Ndlovu.
UMnumzana Edward Ndlovu ongomunye wabafelwa ngabantwana uthe ngemva kokubonakala kwemguwe le bahle baqala ukuphela abantwana.
“Ngemva kwamaviki amabili silwisana lemguwe le emizini yethu, ngoMbimbitho kwabhubha umntanami owayeleminyaka emithathu. Ukubhubha kwakhe kwangisolisa ngoba wayengathi uwele inkanda okuyikho okwenza ngasola ngoba wayesekhulile sengasafanelanga ukuthi awele inkanda.
“Kuthe ngemva kwenyanga wabhubha njalo okamfowethu laye wayewele inkanda. Lapha-ke sahle sabona ukuthi kulomuntu olesandla saya ebantwini kodwa kwaqhubeka sebeze bebahlanu abantwana ababhubhayo bebulawa yisifo sinye. Sithe sisiya ebantwini basitshela ukuthi babulawa ngumuntu othi ufuna impahla zakhe sahle sabamazi ngakho sisazama ukulungisa,” kutsho uMnu Ndlovu.
Ebuzwa ngale indaba uMnu Sibindi uthe kakwazi lutho wavuma ukuthi wahlawula imbuzi mhla inkomo zakhe zingene emasimini kaNdlovu.
“Mina kangazi lutho ngokufa kwabantwana bakoNdlovu kodwa kuliqiniso sibili ukuthi ngahlawuliswa imbuzi ezintathu inkomo zami zidle amabele kaNdlovu,” kutsho uMnu Sibindi.
Usobhuku omkhulu wakule indawo uMnumzana Danisa Ncube ebuzwa ngale indaba uvumile ukuthi uyayazi njalo uzadinga abaphurofethi bezohlola esigabeni.
“Kuliqiniso sibili ukuthi uSibindi wahlawula imbuzi ezintathu ngemva kokuba inkomo zakhe zingene emasimini kaNdlovu. Ngemva kwalokho ngezwa sengibizwa koNdlovu sokubonakala imguwe endlini kungaziwa ukuthi ingene njani. Kuthe kunjalo kwaqala ukufa abantwana kodwa kangikwazi ukuthi kuyini okwadala lokhu ngakho ngizadinga abaphurofethi bezohlola isigaba,” kuphetha uSobhuku uNcube.
