uMthunywa
YiNtatheli kaMthunywa
KULENDODA yeHarare ethi isithwaliswe amagabha avuzayo liluba — ifulawuzi ngokwalo — eyalinikwa ngesinye isihlobo esiseduzane kodwa lamhla lokhu seliyithwalise nzima.
Indoda le ithi kusukela yaphiwa iluba leli, yalihlanyela emzini wayo eBudiriro Extension 1 kayisela kuphumula nanko phela ihlala ilibona liyigijimisa ngapha livutha amalangabi.
UThompson Luke (31) uthi wanikwa iluba leli ngumkamnewabo uSandra Tirivangani (31) wahamba wayalihlanyela emzini wakhe.
Umkamnewabo lo wala wemba phansi indaba yeluba leli uthi yena wamnika nje iluba lokuthi ayehlanyela nje kuphela.
Uthe indaba le ijonge nje ukumngcolisa nanko phela kulokungezwanani kubangwa ilifa. UThompson yena unyathela umduli uthi umka mnewabo nguye owamnika iluba leli elilombala oluhlaza njalo lincwaba wathi kalihlanyele esivandeni sakhe.
UThompson uthi lokhu kwenzakala ngemva kwensuku ezimbalwa bevela beka umnewabo uThomas Luke, eMbudzi, eHarare. Uthe uThomas nguye owayengumka Sandra.
Elandisa udaba lolu kuntatheli uThompson uthe ngemva kokuhlanyela iluba leli lanyamalala lapho ayelihlanyele khona njalo akuzange kusale kukhanya sengathi kumbe lisiphuniwe. Uthe wabikelwa ukuba iluba leli lalivela kulabo ababebancedisile emngcwabeni womnewabo.
“Kangisela thando ngeluba leli engalinikwa ngumka mnewethu wathi ngilihlanyele lakanye ngakwenza lokhu. Wangipha iluba leli ngemva kwensuku ezine sibeke umnewethu uThomas owafa engagulanga.
“Sengilihlanyele iluba leli ngelanga elilandelayo lavuka lingekho njalo kungakhanyi ukuthi kukhona okuke kwahlanyelwa,” kulandisa uThomspon.
Uthe umnewabo selenyanga ezintathu wabhubha njalo yena kala kuphumula kusukela ngaleso sikhathi nanko phela ubona ifulawuzi leli lisiza kuye elele livutha amalangabi.
“Kusukelsa ngiphiwa iluba leli kangila kuphumula ngemva kokulihlanyela ngaqeda nje insuku ezintathu endlini kwasokusiza inyosi ezesabekayo ezafika phezu kwengubo zami engangizembethe ezinye zaya phansi kombheda ezinye zayabuthana kumafasitela. Sathi sivuka ekuseni zilele phezu kombheda kungakhanyi ukuthi zingene ngaphi. Kazizange zisilume mina, umkami kanye lomntanami.
“Ngakhipha imuli yami phandle ngadinga ipulasitiki ngabuthelela inyosi ngazifaka phakathi kwalo. Ngathwala inyosi lezi ngazisa kwesinye isihlobo sami seHighfield. Isihlobo sami lesi laso sesaba ukuzibamba ngaphenduka lazo ngayazitshisa,” kutsho uThompson.
Indoda le ithi seyaze yathi uNkosikazi wayo aye kuzihlobo zakhe ngenxa yamasalamusi la.
“Ngibona umnewethu owabubhayo esiza ngikhangele lanxa ngilele ngiphupha. Umntanami uyabona isidumbu somnewethu owabhubhayo nanko phela siyakuzwa kusithi ‘udaddy omdala nanguya’. Kungakho ngasala ngihlala ngedwa ngenxa yendaba le. Uthi uyabona iluba leli lisiza kuye livutha amalangabi lisenza angathi lifuna ukumtshisa,” kutsho uThompson.
Uthi kubosiyazi bamtshela ukuba iluba aliphiwayo kayisilo luba kodwa ngutokolotshi kanye lomuthi wenotho engawunikwayo okuyikho osokuvuka kusenza amasalamusi la.
“Ngakithi sazalwa saba yisikhombisa kodwa sesisele sibabili lodadewethu. Ubaba lomama bafa belandelana njalo labanye abafowethu bafa ngendlela efanayo,” kutsho njalo.
Uqhubekele phambili esithi kusukela wanikwa iluba leli uzwa abantu behamba phezu kophahla bekhuluma abanye behamba phandle abanye behamba angathi bayagijima bebhoda ngendlu.
“Ngingaphuma phandle akula nto engiyibonayo, indawo zonke lapho engiyakhona bathi lokhu engakuphiwayo kayisilo luba ngutokolotshi.
Ngesikhathi selinyamalele kubikwa laselibuyele kumnikazi walo kungakho ngidinga uncedo.
“Endlini lapho engihlala khona kufika into enjengempisi efika isiphune imbhida kanye lehanyanisi lezinye izilimo.
“Iluba leli lilolaka ngoba lifuna igazi pho-ke lingangibulala kuzasala bani ngakithi,” utsho njalo.
Uthi sesehluleka lokuya emsebenzini ngoba uyagula okwaqala ngemva kokwenzelwa amasalamusi liluba leli.
Ugogo u-Alice Masoko Kwenda (62) weLochnvar eHarare uthe indoda le kayizange inikwe iluba kodwa yanikwa utokolotshi.
