uMthunywa
YiNtatheli kaMthunywa
INHLANGANISO yabalimi eyeZimbabwe Farmers Union (ZFU) ngoMvulo inike inkampani yeGrain Marketing Board (GMB) ingqobe yokuthi ibone ukuba iyaqhelisa iziphala zayo njengoba amalungiselelo esigaba sokulima sika-2021/22 esekuzinga eliphezulu.
UMqondisi weZFU uMnumzana Paul Zakariya uthe izulu elikhangelelwe ukuna endaweni ezinengi zelizwe kusigaba sokulima sika-2021/22 linengi okwenza kukhangelelwe isivuno esiphezulu njengoba loHulumende elokhu eqhubeka engezelela usekelo kubalimi kungakho kulendingeko yokuthi iGMB ibe ilungiselele ukugcina isivuno sezilimo zonke ezisanhlamvu kuhle.
UMnu Zakariya ukhuthaze iGMB ukuthi iqalise njalo ukuqoqa imali yokubhadala abalimi abazahambisa isivuno sabo ekupheleni kwesigaba ukuze kwenqatshelwe ukuphuza ukubhadalwa kwabalimi okuyikho okubangela ukuthi abalimi bathandabuze ukuhambisa isivuno sabo enkampanini le.
Uphinde wakhuthaza iGMB ukuthi iphangise ukuthwala umumbu usuka lapho ozasiwa khona ngabalimi iwusa kuma-depot ukuze kuqinisekiswe ukugcinakala kwesivuno.
Ngakolunye uhlangothi, uMnu Zakariya uphinde wakhuthaza abalimi ukuthi balungiselele ngokupheleleyo isigaba sokulima wengeza wathi kukhangelelwe inala kungakho kubalulekile ukuthi abalimi babe belempahla yokulima eneleyo yesigaba sonke.
“Abalimi kumele babe lempahla eneleyo, baqalise ukulungiselela umhlabathi wabo, phezulu kwakho bavule imbundu ukuze amanzi angami emasimini.
I-GMB ibhadala abalimi i$32 000 nxa bangahambisa ithani yomumbu kukanti ibhadala i$38 000 yezilimo ezincane, njalo ikhangelele amathani angu-1,8 miliyoni kubalimi.
