uMthunywa
Ethel Ncube
INHLANGANISO yeAgricultural and Rural Development Authority (Arda) sikhuthaze abalimi ukuba babe yingxenye yabo ukuze kuthuthukiswe ezokulima kuma-irrigation njalo kwengezelelwe ukudla kusiphala selizwe.
UMkhokheli weAgricultural and Rural Development Authority uMnumzana Basil Nyabadza ukhuthaze abalimi abalama-irrigation ukuthi babhalise insimu zabo kunhlanganiso yabo ukuze baphathiswe ngempahla yokusebenzisa.
“Kulabalimi abalama-irrigation kodwa angekho ngaphansi kwenhlanganiso yeArda njalo impahla yokulima iyasilela kiwo kungakho sikhuthaza labo balimi ukuthi basebenze ndawonye lathi ukuze sibaphathise ngempahla ukuze lezondawo zilinywe kutholakale ukudla esiphaleni selizwe,” kulandisa uMnu Nyabadza.
Uqhubekele phambili echaza ukuthi i-Arda izasebenza labosomabhizimusi labalimi abafisa ukuphatheka kuloluhlelo.
“Sikhangelele ukuthi kube lokubambana phakathi kwabalimi, osomabhizimusi kanye le-Arda kuwonalo umnyaka ukuze kulinywe izilimo ezibalisa umumbu, i-soya beans lengqoloyi umnyaka uze uphele.
“Ngaphandle kokulima ingxenye lezi ezintathu zizaphatheka njalo ekufuyeni izifuyo lazo okukhangelelwe ukuthi ziqhelise umhlambi wesizwe,” kutsho uMnu Nyabadza.
Ubuye waveza njalo ukuthi bayaphathisa njalo abalimi abasendaweni zokulima kodwa beswela ulwazi olufaneleyo emsebenzini wabo.
“Ezinye indawo sezileminyaka zingalinywa ngoba abalimayo beswela inhlanganiso engabancedisa ukuze basebenze ngamandla bathole isivuno esihle bathengise ezinye izilimo ukuze baziphilise.
“Kungakho ngithanda ukukhuthaza abantu abasendaweni ezinje ukuthi bavakatshele amahofisi eArda baveze inhlupho ababhekane lazo kanye lokuthi inganani indawo abafuna ilinywe,” kulandisa uMnu Nyabadza.
UMnu Nyabadza uphethe ngokuthi izilimo ezibalisa umumbu, ingqoloyi le-soya beans bangazilima balakho ukuzithenga.
