uMthunywa
KULENINA leNeshangwe eChivhu elihlala eMbare esigodlweni seHarare elisele likhakhamele kulandela ukubeletha ixoxo.
Lokhu kwenzakale inina leli selilenyanga ezintathu lizithwele okwenze indaba le yasabalala kulelolokitshi.
Inina leli, uNkosazana Chipo Tigere (41) uthe ngeviki ephelileyo wasuka endlini ehamba lomunye udadewabo besiyadinga usizo lwezinhlupho ezibhahileyo emulini yangakwabo kwenye indoda ekhulekela abantu eDzivarasekwa Extension, khonale eHarare okuyilapho afika wahlangana lomhlolo wokubeletha ixoxo.
“Indaba elayizwayo eyokuthi kulenina elabeletha ixoxo iliqiniso, yimi inina lakhona. Lokhu kwenzakala ngesikhathi sihambe ukuyadinga umkhuleko kwenye indoda ekhulekisayo eDzivarasekwa Extension. Sathi sifika lapho kwathiwa wonke owesifazane ozithweleyo kaphakamise izandla lakanye ngenzanjalo.
“Yikho lapho engatshelwa khona ukuthi angizithwalanga kodwa ngaloywa njalo owangiloyayo wafaka enye into esibelethweni sami,” utsho njalo uNkszn Tigere.
Uthe watshelwa ukuthi ayekhangelwa esibhedlela ukuthi uzithwele na lakanye wahamba kwatholakala ukuthi uzithwele ngempela.
“Mina lodadewethu lamanye amanina ayelapho sakuqinisekisa sibili ukuthi ngizithwele, ngemva kwalokhu kwathiwa ngiyethenga amanzi ezitolo ngawanatha ngahle ngezwa isisu siqala ukuba buhlungu sengihelelwa. Lokhu akuthathanga isikhathi eside ngahle ngabeletha ixoxo leli okubikwa laqala ukuphuma inyawo zaphambili okwethusa abantu ababelapho,” kutsho uNkszn Tigere.
“Khonokho nje ngezwa sengikhulekelwa ngasengitshelwa ukuthi ngaloywa ngokunjalo lokhu kuphoswa kwabangela ukuba ngingafi ngazithwala futhi.
“Mina vele angilamntwana empilweni yami njalo ixoxo leli latshiswa emzini walumfundisi kodwa kwathatha isikhathi ukuze litshe ngokupheleleyo,” utsho njalo.
“Ngenxa yomhlola lo ngahle ngathutha lapho engangihlala khona ngayahlala lomnwawami.
UNkosazana Paidamoyo Tigere (26) ongudadewabo wenina lokubeletha ixoxo uthe wayekhona kusenzakala inkemenkeme.
“Ngangikhona udadewethu ebikelwa ukuthi lokhu ayesithi yikuzithwala kwakungayisikho kodwa kwakungamaloyo.
“UNkszn Tigere uthe wayengakabhalisi isisu esibhedlela ngenxa yokuswela imali kunye lokuba wayebona angani sisesesincane isisu.
“Ngatshelwa ukuthi angisenelisi ukubamba isisu njengoba kuthiwa isibeletho sami sahle saphazamiswa lixoxo leli. Okubuhlungu yikuthi angilamntwana njalo besengisithi sengizamthola kukanti hatshi,” kutsho uNkszn Tigere.
UMnumzana Heavington Matika Samuronda onguMbhishopu weDzivarasekwa Extension uthe inina leli lafika lidinga ukukhulekelwa njengaye wonke umuntu kodwa lacina libeletha ixoxo.
“Inina leli laliphakathi kwamanye amanina azithweleyo yikho lapho engamtshela okokwenza wacina esebelethe ixoxo. Kunengi esihlangana lakho okuyizimanga ezesabekayo nsuku zonke. Okwenzakalayo emhlabeni kunzima, abantu bayaloya phandle lapha,” kutsho uMbhishopu Matika.
