uMthunywa
Langelihle Moyo
INHLANGANISO yeAgritex isixwayise abalimi abafuyileyo ukuthi bagcine amahlanga ezilimo lotshani osebuwomile ukuze kube yikudla kwezifuyo ngesikhathi sebusika.
UMqondisi wezokulima lokufuya kunhlanganiso ye-Agritex esabelweni seMatabeleland North uMnumzana Dumisani Mbikwa Nyoni uthe abalimi abafuyileyo kabagcine kuhle utshani lezilimo esezitshiswe lilanga.
“Abalimi bezifuyo kabagcine izilimo lotshani osobomile okukhangalelwe ukuthi akusasebenzi, babufake eziphaleni ukuze kudliwe yizifuyo ngesikhathi sokoma.
“Izilimo ezinengi sezonyiswe lilanga ngoba izulu alisani. Izilimo lezi kaziselancedo ebantwini kodwa yikudla okuhle kuzifuyo.
Agritex
“Utshani, umumbu osutshile kunye lezinye izilimo ezikhulela phansi abalimi balakho ukukuhlanganisa le-molasses bakuphe izifuyo,” kuchasisa uMnu Nyoni.
Uqhubekele phambili esithi izinga lokutshisa okukhona sokungamemethekisa imlilo etshisa iganga.
“Balimi bezifuyo kufanele liphangise libuthe utshani beganga andubana kuqale imililo yeganga. Sikhuthaza abantu ukuthi bengaqalisi umlilo ngoba lokhu kufaka izifuyo engozini yokutsha futhi lokhu kwenza izifuyo zibulawe yindlala ngoba kuyabe kungasela madlelo,” kutsho uMnu Nyoni.
Uphethe ngokuthi utshani lamahlanga la kumele kugcinwe emthunzini.
“Kuqakathekile ukuthi ligcine amahlanga lotshani lobu emthunzini ukwenzela ukuthi kungatshiswa lilanga, ukuze kungalahlekelwa yikudla okwakha imzimba yezifuyo,” kuphetha uMnu Nyoni.
