uMthunywa
Blessing Moyo
ABALIMI sebekhuthazwe ukuba bangatshisi amahlanga omumbu nxa bengavuna kodwa bawagcinele izifuyo zabo ukwenzela isikhathi sebusika.
UNkosazana Gota Taruda ongumlimisi esigabeni seMangwe ubike ukuba amahlanga akumelanga atshiswe ngoba ayikudla kwenkomo njalo enza lomquba.
“Abalimi kumele bangatshisi amahlanga ngemva kokuvuna kodwa bawagcine ngobunono obuphezulu ngoba ayikudla kwezifuyo njalo angaba ngumquba nxa umlimi engagebha igodi awafake phakathi, lokhu okubizwa ngokuthi yi-compost. Abangumquba omuhle kakhulu.
“Abalimi kumele bagebhe amagodi angatshoni kakhulu besebefaka amahlanga phakathi bathele njalo i-molasses phezulu kwawo besebethatha ipulasitiki emnyama bavale amahlanga ngalo,” kutsho uNkzn Taruda.
Ubike njalo ukuba amahlanga la kumele agcinwe ngendlela yokuthi ayahlala isikhathi eside ukuze aphiwe inkomo nxa kungela kudla emadlelweni.
“Amahlanga la ayahlala isikhathi eside ephansi lapha, umlimi uyabe ethatha lapha egodini lakhe esipha inkomo zakhe nxa kungasela kudla emadlelweni loba nxa engafuni ziyekudla khatshana uyazinika amahlanga la. Ngokwenza lokhu umlimi uyabe ehlenge inkomo zakhe endlaleni,” kuphetha uNkzn Taruda.
