uMthunywa
Nkosilathi Sibanda
ABADLALI beChicken Inn bathi bazadlula behwitha phezulu kweMamelodi Sundowns ngoMgqibelo ebusuku ngesikhathi amathimu la engqikilana kumkhankaso wenkezo yeCaf owamaqembu azintshantshu kunguqu yaseAfrica.
Indala zombili zidibana kusigaba sesibili enkundleni yeLucas Moripe ePitoli ngehola lika-8 ntambama.
AmaSandawana angena kulumdlalo elwisa ukunqoba ngoba adliwa 1-0 kuhlandla lakuqala enkundleni yeBarbourfields koBulawayo kumaviki amabili adluleyo.
Umgadli kuzwa uMitchell Katsvairo watshaya umtshoko webhola elatshiya unozinti weSundowns uWayne Sandilands elenga.
Ekhuluma emele iqula labadlali beChicken Inn ngoLwesibili, uDanny Deco Phiri uthe loba bedlala khatshana lekhaya labo, bazathembela kusekelo lwezizalwane zeZimbabwe ezigcwele eSouth Africa.
“Okungcono ngalumdlalo yikuthi siya ePretoria siphezulu kwayo iMamelodi Sundowns ngemva kokuyinqoba.
Asikhohlwa ukuthi kumele siphinde ukuyinqoba egumeni layo.
“Enkambeni siyaqolotsha. Silinde ukunqoba. Siyazi ukuthi iSundowns izathembela kumsindo wabasekeli bayo, lathi silabo abasekeli abaphuma eZimbabwe kodwa behlala eSouth Africa,” nguDeco lo.
Umbono wabadlali bamaGamecocks lo ungasebenza ngoba umgcinisihlalo weqembu uLifa Ncube ubikele uMthunywa ngoLwesibili ukuthi kulamabhasi amathathu azahamba labasekeli babo bephuma koBulawayo.
“Usekelo silalo kubathandi labalandeli bakanobhutshuzwayo lapha eZimbabwe. Sizakhipha amabhasi amabili azathwala labo abalesifiso sokuthi bayebukela iChicken Inn isiyanqoba kuCaf Champions league,” nguNcube lo.
Phezulu kwalokhu, abasekeli benguqu kuleli bazathola ithuba lokubukela umdlalo lo kumabonakude weSupersport.
Izikhulu zeMamelodi Sundowns zibike ebulenjini ukuthi zivumelane leSupersport ukuthi umdlalo lo ubikiswe.
Kubikwa yiwo wodwa umdlalo weCaf Champions league ozaphuma kumabonakude kulimpelaviki.
Unobhala weChicken Inn uTavengwa Hara ubike ukuba abalandeli bomdlalo abazakuya ePitoli bazabhadala i700 randi ezasebenza lokubhadala ukungena enkundleni.
“Sinxusa bonke abalandeli bomdlalo wenguqu ukuthi babuye ngobunengi babo bephelekezele ithimu isiya ePretoria.
IChicken Inn ayilabasekeli abanengi ngakho sinxusa abasekeli bomdlalo ukuthi basincedise ngokuza ngobunengi njengalokho abakwenza eBarbourfields kumaviki amabili adluleyo.”
Kusenjalo, abalandeli beSundowns sebekhuze ithimu yabo ukuthi iqaphele ngoba iChicken Inn ingaphinda umphehlo.
“IChicken Inn ikhanya iliqembu elibukhali kulelethu. Angeke sayinqoba nxa sidlala kanje,” kutsho uNomps Masala kubulembu beTwitter yeSundowns.
“Umfana lo, uMitchell Katsvairo kabuye kuSundowns. Ibhola alihlohla koBulawayo liyamangalisa,” nguNkazimulo Maphumulo kuTwitter.
UToti wa Lekhosi laye osekela iSundowns uthe: “ISundowns kumele inqobe. Akumelanga bevumele ukuhlohlwa yisethekeli masinyane emdlalweni. Ukuba lemvimbi ezinengi akusoke kuncede.”
Umqeqetshi weSundowns uPisto Mosimane usephenduke inhlekisa kubaqeqetshi bamaqembu amanengi ngokuthanda ukufaka imvimbi ezedluliseyo eqenjini lakhe.
UMosimane uthole ukuchothozwa lokhu kusasele amalanga ambalwa ukuthi iMamelodi Sundowns idlale leChicken Inn yaseZimbabwe kumdlalo wenkezo yeCaf Champions League.
Indlela uMosimane adlalisa ngayo imvimbi ezingeni emuva sekubizwa ngokuthi yikumisa “ibhasi” kunguqu.
UMosimane uyavuma ukuthi ayikho eyinye indlela iqembu lakhe elingavimba ngayo ngaphandle kokuthi avimbe ngabadlali abanengi.
Abadlali beChicken Inn abakhethiweyo:
Onozinti: Elvis Chipezeze, Pride Zendera
Imvimbi: Ben Nyahunzwi, Moses Jackson, Passmore Bernard, Devine Lunga, Lawrence Mhlanga
Phakathi kwenkundla: Danny Phiri, Edmore Chirambadare, Thabani Goredema, George Majika, Tafadzwa Kutinyu, Brian Juru, Physwell Madhazi, Clemence Matawu
Abagadli: Mitchell Katsvairo, Obadiah Tarumbwa, Moses Demera.
